Móðir í hjáverkum?

Dæturnar duglegu

2010-01-06T11:34:00.003Z

Minns hefur alltaf átakalega lítinn tíma í blogg og skrif. En ég ætla að henda inn einni mynd af systrunum sætu með von um að þær gefi mér kannski smá stund 1x í mánuði til bloggskrifa út árið 2010 svo þetta blogg leggist ekki alveg af.

Dagar myrkus

2009-11-18T15:37:00.008Z

Í morgun fórum við Óðinn (+ Sól) bæði með Dögun á leikskólann þar sem árlegur viðburður á Dögum myrkus var á döfinni.

Krakkarnir á leikskólanum voru búin að mála hver sína krukkuna til að setja út í garð í myrkrinu með logandi kerti í. Þetta er alltaf jafn skemmtileg athöfn og Dögun var voða stolt af sinni (að sjálfsögðu) bleiku krukku.

Kósí stemning, en vonlaust að taka óhreyfðar myndir án þrífótar.

Dögunar krukka er sem sagt þessi bleika sex-kanntaða.

Afmælisstelpan Sól

2009-11-04T22:00:00.009Z

Nokkrar myndir af Sól frá því í dag.

Afmælisstelpa í nýjum kjól.

Flottir pakkar

Kortið var samt mest spennandi

Gott að hafa aðstoðarmann

Þessi fína dúkka kom m.a. frá ömmu og afa í Rvk.

og þessir flottu bílainniskór frá Köben

Svo fékk Sól pakka frá lamgömmu

sem innihélt þessa fallegu hálsfesti

Vááá...faaaaggggglegt!

1 árs í dag!

2009-11-04T09:54:00.011Z

Um þetta leiti (eða um kl. 10:00) þann 4. nóv 2008 var ég vakin á Lansanum af fæðingarlækni og nemum með þessari setningu: "Við erum að hugsa um að koma barninu í heiminn í dag þar sem þú ert komin yfir 37 vikurnar og mælingar líta ekkert sérstaklega vel út..........". Það fyrsta sem ég hugsaði var: "Frábært, amma fær þá krílið í afmælisgjöf!" Reyndar var ég nú komin svona nett af stað um nóttina en ekki víst að ég hefði náð að koma Sólinni út á "réttum" degi ef ekki hefði verið ýtt á. Ég held samt að það geti ekki verið um tilviljun að ræða, enda hefði ég ekki getað fundið betri manneskju til að fá Sól í afmælisgjöf.

Það skrítna í þessu öllu saman er nefnilega að:

Dögun fæddist tveimur dögum eftir afmælið mitt.
Sól fæddist tveimur dögum eftir afmælið hans Óðins.
Úlfur Stefán (bróðursonur) fæddist á afmælinu hans Braga afa ári áður.
Sól fæddist á afmælinu hennar Unnu ömmu.

En svo er önnur saga sem ég hef ekki sagt frá fyrr en nú:
Tveim nóttum áður en Sól kom í heiminn vaknaði ég upp með martröð. Fullt af eldri konum (eins og seiðkonur eða hópur af eldri ljósmæðrum) stóðu í hálfhring yfir rúminu mínu og hvísluðu. Ég man bara að hvíslið magnaðist og varð eins og suð, ég fékk gæsahúð og mikinn hjartslátt og hrökk upp í svitakasti. Ég taldi mig aðeins hafa verið að dreyma og lokaði augunum aftur en þá birtust þær enn á ný, suðið var óbærilegt og þetta var eins og í lélegri bíó-hrollvekju. Eftir þetta þorði ég ekki að loka augunum og vakti það sem eftir lifði nóttu. Ekki veit ég hverjir þetta voru eða hvort mig var að dreyma eða ég í annarlegu ástandi vegna veikinda, en ég er samt næstum viss um að þessar konur vildu að hún amma mín elskuleg fengi Sólina í afmælisgjöf.

Núna ári seinna eiga sem sagt þessar tvær perlur afmæli, Unna amma og Sól. Frá fyrstu kynnum hafa þær verið góðar vinkonur og kemur ákaflega vel saman.

Sól glæný

Amma og Sól hittast í fyrsta sinn.

Sól næstum 1 árs

Amma og Sól

- Góðar saman -

Innilega til hamingju með daginn báðar tvær!

Og tíminn líður....

2009-11-02T15:01:00.005Z

Í dag á minn yndislegi og ofurfagri ektamaður afmæli. Smelli hér með inn einni mynd af unglingnum með örverpunum.
Í fyrra missti ég einmitt af afmælinu þar sem ég var stödd kasólétt á meðgöngudeild Landspítalans, nú hins vegar náði ég að smella á hann kossi á réttum degi. Hugsa sér hvað þetta líður hratt. 2 dagar í 1 árs afmæli Sólarinnar.

Til hamingju með daginn minn kærasti kæri!!!

Skoppa og Skrítla

2009-08-17T22:56:00.021Z

Á laugardaginn vorum við löt fram undir 14:00 er við mættum spræk á listasýningar í Sláturhúsinu. Annars vegar ljósmyndasýninguna "Stórt og smátt" eftir Höllu Eyþórsdóttur og svo snilldar sýninguna "Einu sinni er"á vegum Handverks og hönnunar.
Einnig lentum við Dögun á fatamarkað rauðakrossins og þar græddi pían svei mér mikið.

kjól með 70's sniði
silfurskó
fjólubláa vængi og töfrasprota
dúkku
rautt pils (frá Gulrótinni)
Sól fékk Bangsimon skokk (líka frá Gulrótinni)

Dögun með hluta af góssinu.

Sól í góðum fýling eftir sýningastand.

Á sunnudagsmorguninn fórum við inn í Hallormsstað í þeim tilgangi að sjá idolin Skoppu og Skrítlu í Atlavíkinni. Sá túr lengdist þó óvænt heilmikið. Eftir S&S ákvað Dögun að fara og vaða aðeins og læknum í Atlavíkinni og kasta steinum í Lagarfljótið. En þar sem hún mátti ekki vera að því að bíða eftir mömmu sinni, meðan mamman smellti af nokkrum myndum, óð hún út í lækinn þar sem hann er dýpstur og rennblotnaði upp að hnjám. Það truflaði hana þó lítið og eftir steinakast ákváðu þau Óðinn að fara í ferjusiglingu með Orminum á meðan við Sól skófluðum í okkur krukkumat í góða veðrinu.

Siglingin var þó klukkutíma lengur en við bjuggumst við, en við græddum nú samt á því. Gulræturnar (amma og afi) hringdu nefnilega á meðan og buðu okkur frímiða á Mannakornstónleika í Mörkinni á Hallormsstað. Við fengum þau því til að koma með þurr föt á Dögun og meiri krukkumat fyrir Sólina og slógum þessu upp í kæruleysi í dandala-blíðu.

Skoppa og Skrítla

Dögun með Skrítlu

Krakkakríli saman með idolunum

Dögun með elsku Skoppu sinni (Skoppa er þessi bleika þið skiljið)

Þarna var batteríið búið í góðu vélinni og notast við gömlu litlu vélina.

Sól sofandi í Atlavík

Beðið eftir feðginunum

Dögun að kasta steinum

Rannveig var líka á staðnum, fæddar sama dag þessar tvær!

Mannakornstónleikar í Mörkinni

Kósí stemning

Dögun var þó heldur lítið til friðs og hnoðaðist á ömmu sinni stanslaust...

...eða þar til mamman fór með hana að óskatrénu þar sem hún setti pening í tréð og óskaði sér.

Hún tók þessu mjög alverlega.

Grátandi Sól með gulrót, hvar er hún amma súkkó á svona stundum??? Nei en til að segja satt grætur hún af því að mamman tók af henni gulrótina í 3 sek og hún trylltist á meðan. Slík ást á gulrótum er vandfundin.

Sól í nýju dressi frá Systu

"YO MAN"

Hverfahátíð og skrúðganga.

2009-08-17T09:51:00.017Z

Ormsteiti er í fullum gangi hér á Egilsstöðum þessa dagana og var setningin á föstudaginn með tilheyrandi hverfahátíð og skrúðgöngu.

Þar sem að það vantaði fólk í smink fyrir skrúðgöngu ákváðum við Dögun að fórna hverfagrillinum og mæta í staðinn að mála fríðan hóp af fólki í Sláturhúsinu. Dögun var svo heppin að það fannst einn auka búningur á hana og hún fékk því leyfi til að vera með í skrúðgöngunni í fullum skrúða aðeins 4 ára gömul. (held að næstyngstu krakkarnir hafi veið milli 10 og 11 ára) Hún tók starfi sínu mjög alvarlega og hermdi eftir öllum hreyfingum í sínum hóp og stóð sig mjög vel því þetta var langt og strembið. Mættum klukkan 18:00 og vorum komin heim um 23:00.

Hér má svo sjá nokkrar stemningsmyndir af Karnevalinu mikla! Nennti ekkert að eiga við þær, set þær bara inn hráar og fínar. Svo er auðvitað bannað að stela þeim nema með leyfi, því ef klikkað er á myndirnar birtast þær í fullri stærð ;o)

Uppblásnir skúlptúrar

Elva og Dögun

Flottar skvísur

Litrík skrúðganga

Gull og glimmer - gerist ekki betra

Allir taka þátt, jafnt hundar og gellur á traktorum

Engu til sparað - flottustu kaggarnir í bænum fengnir að láni

Lilla flott að vanda - fyrrum framkvæmdarstjóri.

Lóa gella og Gurrý núverandi framkvæmdarstjóri Ormsteitis

Eldspúandi drengir

Íbúarnir að sópast að úr sínum hverfum

Mikið dansað

Dögun alsæl með stóru stelpunum

Elva með dóttur og vinkonu hennar

Lóa listakona

Allir í leikjum á Vilhjálmsvelli áður en skrúðgangan fór aftur niður í Sláturhús á tónleika.

Næst koma svo myndir af Skoppu og Skrítlu í Atlavík og tónleikum með Mannakornum í Mörkinni.

Prinsessuherbergi Dögunar

2009-08-13T12:14:00.009Z

Prinsessan á heimilinu er afar ánægð með herbergið sitt, enda má hún vera það eftir allt dúllið. Móðirin hefði þó kosið aðeins annan brag á "lookið" en þegar kemur að prinsessum yfirleitt, fá mæðurnar nú ekki að ráða miklu.

Við fengum að mála vegginn dökkbleikan sem var svo eiginlega rauður og hugmyndin var að mála hvítar trjágreinar á með fljúgandi fiðrildum. Vegna tímaleysis endaði þetta svona.

Prinsessan í "hásætinu"

Rómó stemning á kvöldin

nóg pláss

Gulla-hillan hennar Dögunar

Kjólahornið með svefnsófa fyrir vini og vinkonur.

Gamlan dúkkuvagn má finna inn á milli bleiks dóts og forláta spiladós frá DK sem Sól lánaði Dögun í herbergið. Enda verður Sólin herbergisfélagi systur sinnar innan skamms.

Svo var fiðrildunum skellt á vegginn - mamman vildi helst sleppa þeim en Dögun tók það ekki í mál.

Þeim var því troðið hér og þar á vegginn.

Hver veit nema aðrir partar nýja hússins birtist síðar. En þetta er gott í bili. Vona að engir hafi óverdósað af bleiku prinsessudóti.

Yfir og út!

2009-07-30T15:12:00.008Z

Systurnar hafa oft á tíðum þótt bæði líka og ólíkar.

Hér eru myndir af þeim á sama aldri og þekki maður ekki þeim mun betur til þá er auðvelt að ruglast á þeim....... og þó.... Sól er eins og snýtt út úr karli föður sínum, við vonum bar að það eldist af henni greyinu.

2009-07-29T22:51:00.015Z

Síðustu dagar hafa verið vægast sagt leiðinlegir hvað veður varðar. Ég er farin að spyrja mig að því hvaða austfirðingur hafi skitið svona ærlega í buxurnar í óþökk veðurguðanna. Þetta er auðvitað ekkert eðlilegt sumar!

En ef ekki væri fyrir yndisleg börn og frábært fólk hefðu þessir dagar liðið enn hægar.

Sól til í rigningarsuddann á Austurlandinu

Dögun gelgja að pósa

...og finnst það rosa gaman.

Svona getur maður látið fara vel um sig fyrir Bræðslutónleika á Borgarfirði eystri. Þrátt fyrir vind og pínu svala reddaðist þetta allt.

Fyrir utan Bræðsluna. Þorvaldur D. að klípa Sól sem fannst þetta undarlegar aðfarir frænda síns, en þorði þó ekki að mótmæla.

Systur á leið á tónleika

Palli flottastur að vanda - léleg mynd en þið náið stemningunni.

Fjölskylduvænir tónleikar með afbrigðum.

Í kulda og sudda er um að gera að sjóða börnin bara í potti ættingjanna. Jónína tók frænkur sínar Dögun og Bergþóru Eddu í pæjuferð sem endaði í heitapottinum. Sól fék líka að vera með.

Pæjur í potti.

Sól kát í leikgrindinni - það er mjög töff þessa dagana að gera svona ógeðisface.

Samt er hún nú bara svona sæt.

Helgin

2009-07-20T09:37:00.017Z

Áttum góða daga í sveitinni bæði á þriðjudaginn og svo um helgina. Fórum á laugardegi eftir hádegið og komum heim um kvöldmatarleitið á sunnudegi.

Dögun var alsæl með að leika við frændsystkini sín úti og inni, sérstaklega Bergþóru Eddu og þær voru ótrúlega góðar saman og fáir ef nokkrir árekstrar.

Auðvitað var grillað með tilheyrandi veigum og fengu allir 15 einstaklingarir sem gistu í sveitini vel í bambann. Ekki lítill hópur í einu húsi, en nóg pláss samt.

Erla var búin að taka borðstofusettið í sveitinni í gegn síðustu helgi og pússa það allt upp - borð og 8 stóla takk fyrir pent - og hvítta það. Verkefni helgarinnar var svo að sníða svamp á seturnar og yfirdekkja með hreindýraleðri. Þetta tókst ótrúlega vel, þó það hafi kostað aukaferð í Egilsstaði til að ná í saumavél og heftibyssu, og útkoman varð algjörlega nýtt borðstofusett með Icelandic design sessum þar sem allir lögðu sitt af mörkum. Karlmennirnir veiddu hreindýrin, skinninn voru sett í sútun, konurnar afsöluðu sér þorrablótsdressunum til að búa til sessur, sessurnar voru hannaðar, saumaðar, strekktar og festar á. Svo var vöfflukaffi til að fagna í lokin!

Árni Daníel hress

Nóg að gera með 4 stk. 4 ára og yngri

Gott að eiga strætó

Dögun listamaður

Fallegt í sveitinni þrátt fyrir drungalegt veður

Hér er svo helgin komin og fleiri mættir

Sól superman

Sæta frænkur!

Flotta borðstofusettið - því miður ekki til "fyrir" mynd. En það er úr furu svo það var miklu dekkra og með vínrauðu tauáklæði.

Nú bíður þetta bara eftir öllum stóru veislunum sem haldnar verða á Hreimsstöðum!

Já SÆLL

2009-07-17T11:49:00.002Z

Fyrsti vinnudagurinn í dag eftir fæðingarorlof. Er enn hálf rugluð og tölvan mín í vinnunni ekki á staðnum svo ég hef lítið annað að gera en að blogga og fá mér kaffi.

En svona án gríns er ALDREI dauð stund til að blogga heima með 2 prinsessur og 1 ektamann í sumarfríi. Stelpurnar þurfa sína umönnun og athygli 24 tíma sólarhringsins og ektamaðurinn líka svo sem, en aðalega er hann að lesa fréttir og tölvupóst í tölvunni MINNI þegar ég á nokkrar auka mínútur til stefnu.

En nú verður vonandi bót á máli fyrst ég er komin í vinnuna og fæ smá frið í kaffipásum til að blogga.

Ráðagóð húsmóðir

2009-05-18T17:56:00.004Z

Í tæp 4 ár er mig búið að dreyma um að eignast ákveðna kerru. En þar sem ég fékk að gjöf dýrindis barnavagn frá foreldrunum þegar Dögun fæddist hafði ég enga afsökun til að sérpanta kerru erlendis frá.

Síðasta vor sá ég svo að Snúðar og Snældur voru orðnir umboðsaðilar fyrir draumakerruna mína.
Ég var ekki lengi að sannfæra Stínu fínu svilkonu um ágæti kerrunnar og hún splæsti í eina undir krílin sín.
Eftir að Sól fæddist hélt ég áfram að nota vagninn góða - enda um ævieign að ræða þegar Emmaljunga er annars vegar. En mig dreymdi þó áfram um kerruna fínu. Þarna á milli var Kristín vinkona að vandræðast með kerru undir sína stráka og ég benti henni að sjálfsögðu á hvar hægt væri að fá draumakerruna. Hún lét fallast og var hæst ánægð.

Nú var ég orðin frekar óþreyjufull og kerran veik ekki úr huga mér.

Við keyrum um á litlum bíl sem er er góður að mörgu leiti en ókosturinn er að Emmaljunga vagninn kemst ekki fyrir nema að hertaka framsætið og að Óðinn labbi (ekki labba ég alla vega). Þetta er auðvitað frekar þreytandi þegar þarf að skutlast á milli staða með vagninn. Þarna byrjaði að glitta í vonina..... hvernig væri að minnka vagninn niður í kerru???
En vagninn einn og sér dugði ekki alveg.... því tók ég á það ráð að selja undan aumingja Sól: vagninn, minni kerru,burðarrúm, bílstól og base til að hala inn fyrir einni skitinni draumakerru. En viti menn, það tókst að lokum.

Nú eigum við því hárauða Phil & Teds kerru undir Dögun og Sól - mér (aðalega) til mikillar gleði. Við erum samt öll hæst ánægð með þetta enn sem komið er því hún tekur lítið pláss og kemst í skottið á bílnum og var n.b. ódýrari en nýr bíll. Emmaljunga verður samt sárt saknað og til að missa hann ekki alveg úr augsýn kom ég honum fyrir í góðum höndum.

En nú er bara að vona að kerruskömmin standi undir öllum þeim væntingum sem ég hef!

6 mánaða

2009-05-04T21:00:00.003Z

Í dag er sólskins Sólin okkar 6 mánaða - ósköp hvað tíminn líður hratt.

Til hamingju með daginn litla mús.

Sumarboði í stofunni.

2009-05-04T15:57:00.010Z

Um daginn kom þessi drottingar ómynd í heimsókn til okkar á Lagarásinn. Eftir nokkurra tíma heimsókn var henni að lokum hent út, enda óþolandi svona gestir sem hvorki boða komu sína með góðum fyrirvara né stoppa skynsamlega lengi.

Við fengum svo þessa dásemdar kónguló í morgungjöf í morgun. (Hún var búin að hreiðra um sig á stólbaki í stofunni í myndar vef). Ég beytti miklum þrýstingi á Dögun að við myndum halda henni og gefa henni nafn. Það fékk engan hljómgrunn. Og þegar ég gaf henni fiskiflugu að borða varð Dögun enn minna spennt.

Hér smjattar hún á flugunni

Henni var því líka kastað á dyr, nafnlausri með öllu. En kannski bara eins gott þar sem kóngulóar-búskapur móður minnar um árið endaði nú ekki á besta veg! Ég hugsa samt að menn hætti að koma í heimsóknir til okkar með þessu áframhaldi.

En eitt er á hreinu og það er að sumarið er á næsta leiti!

17. apríl!!!

2009-04-17T11:12:00.003Z

Af því að ég er svo dugleg að blogga, eða þannig, get ég nú ekki sleppt því að setja inn merkisblogg fyrir daginn í dag.

Hann pápi minn á nefnilega afmæli í dag, unglingurinn.

Elsku pabbi, innilega til hamingju með daginn. Hlökkum til að sjá þig í humrinum í kvöld!!!

Hjálp!

2009-03-21T13:36:00.002Z

Maður á sem sagt bara eitt gott ár eftir, að minnsta kosti eftir þessu að dæma.
En þar sem brjóstargjafaþokan er einnig í hámarki er ekki víst að ég eigi neitt eftir.

Hún á afmæli í dag, hún á afmæli í dag.....

2009-03-06T00:03:00.039Z

Þann 6. mars 1959 eða fyrir slétt 50 árum fæddist hjónunum Guðjóni Sveinssyni og Jóhönnu Sigurðardóttur lítið stúlkubarn er nefnd var Anna Björk. Í dag fagnar hún stórafmæli sínu og til að hjálpa henni að rifja upp liðin ár ætla ég að setja inn nokkrar myndir af 50 ára ferli þessarar merku konu.Hér er Anna Björk með Guðnýju vinkonu sinni á Breiðdalsvík í gamla daga.Hér er hún orðin eldri (Stefán Númi alveg eins og hún).Hér er hún svaka gella á unglingsárunum!

Hér er Anna Björk hörkutól.
Þetta er svona tíbísk "gemsa-mynd" sem flestar ungar konur eiga af sér í dag.... þessi er hins vegar tekin á filmuvél, en uppstillingarnar breytast greinilega lítið í gegnum árin.
Ung og saklaus í kór.Íþróttaliðið - hún var einu sinni efnileg þar... hef ekki séð hana mikið á íþróttaskónum eftir það ;o)Svo ung og sææææt!
Enda farin að skella sér á böll og hitti þar einn myndar-mann og Stefán heitir hann.....

...og úr varð þessi ágæti drengur sem fæddist 24. maí 1978

Litla fjölskyldan á góðum degi.

Og önnur..
..hjónin yngjast nú bara með árunum ef eitthvað er...sei, sei já..

En auðvitað var ekki nóg að eiga einn strákbjána.... svo ofninn var hitaður aftur.

og mikið hlýtur þetta að vera besta móment í lífi Önnu Bjarkar, það þegar þessi fagra stúlka kom í heiminn 19. júní 1983 kl. 13:07 á Lasanum. Ég efast ekki um það í eina sekóntu!

og fjölhæf er hún þessi elska og kallar ekki allt ömmu sína.

Hér er svo þessi myndar fjölskylda um jól líklega 1985, fínt hár mamma!

Hér erum við s.s. komin á krumpugalla&permanent-tímabilið.

sem betur fer stóð það ekki lengi....

og hárgreiðslan breyttist líka...til hins betra er mér óhætt að segja...

smá axlapúða tímabil 1993, hliðarspor í tísku má öðru hvoru...

En þegar fullkomnun er náð hættir mönnum til að fara yfir strikið....
því fæddist örverpið þann 1. ágúst 1995.

hér er svo ein síðan 1999
Hér hætti Anna Björk að telja....

Svo:
eftir mann, 3 börn, 2 tengdarbörn og
3 barnabörn.....
Dögun 2005

Úlfur Stefán 2007

Sól 2008

.....lítur Anna Björk ekki út fyrir að vera deginum eldri en fimmtug!

Elsku mamma mín, innilega til hamingju með daginn og árin þín 50, hvert eitt og einasta. Þau gera þig að þeirri mannerskju sem þú ert, duglegri og sterkri konu sem vert er að líta upp til.... (þrátt fyrir örfá tísku-hliðarspor sem líta má fram hjá) ..... :o)

Klárlega besta mamma í heimi!

P.s. og vertu þakklát fyrir að:

1) hafa ekki verið ung á tímum stafrænna myndavéla, mikið eiga dætur mínar eftir að hafa úr mörgum ljótum myndum að velja þegar ég verð 50.
2) að ég komst ekki í myndaalbúmin hjá ömmu og afa í Breiðdal
3) fyrir að ég sleppti möööörgum myndum sem hefði sannarlega verið skemmtilegt að skoða, en þín vegna setti ég þær ekki inn ;o)

Lobburnar

2009-02-26T22:51:00.005Z

Systurnar eiga góða ömmu sem bráðum verður ógeðslega gömul, þ.e. í næstu viku. Sú prjónar nú samt ekki þó hún geti það. Þess vegna fá Dögun og Sól bara lánaða eina Dísu prjónaömmu hjá Úlfi Stefáni frænda svo þær eignist góðar lobbur eins og sannir íslendingar.

Hér er Dögun í sinni lobbu og vettlingum frá Dísu á sunnudagsrölti með foreldrunum

Hér eru Sól undirhöku-safnari og "gamla" amman sem verður bráðum 25 ára......(x2)...

öskudagsmyndir.

2009-02-26T20:09:00.007Z

Dögun blómálfaprinsessa:

Mömmuklúbbs-félagar Sólarinnar:

Sól randaflugu-fangi/ eða bara eftirmynd af Óðni....s.s. Óðný litla:

Svo varð Dögun líka að vera Lína langsokkur þegar hún kom heim af leikskólanum:

Afmæli afmæli.....

2009-02-13T22:23:00.003Z

Ofur-afmælisbörn mánaðarins eru tvö.

Í fyrsta lagi var Dagur Skírnir 22 ára þann 2. febrúar. Fyrsta afmælið eftir að hann fluttist að heiman - til hamingju með það aftur!

Svo er hún Dagrún Sóla eða "Systa" eins og hún heitir á þessu heimili 20 ára í dag! Innilega til hamingju með merkisafmælið elsku, elsku! Hlökkum til að sjá þig á morgun.

Dagur Skírnir, Dagrún sóla, Dögun og Sól

Laugardagur til leti

2009-02-07T16:58:00.006Z

Ég hef oft heyrt að menn sjái gjörðir sínar í börnum sínum, ég hef aldrei gefið þessu neinn sérstakan gaum fyrr en um daginn. Það þurfti ekki nema 2 setningar frá frumburðinum til að minna mig á að "litlir pottar hafa líka eyru".

1) Dögun er e-ð þreytt á barnatímanum í sjónvarpinu og vill slökkva á tækinu en nær ekki að ýta nógu fast á takkann: "Hvernig slekkur maður á þessu ANDSKOTANS sjónvarpi???"

2) Dögun er e-ð að snúast í kringum mig í sófanum þegar ég var að gefa Sól, og ég var með löppina uppi á sófaborðinu. Það fór e-ð í pirrurnar á Dögun sem þurfti að sjálfsögðu að komast framhjá akkúrat þessa leið. Ég sagði henni að ég væri svo þreytt og ég þyrti að hafa löppina þarna á meðan Sól væri að drekka. Eftir að hú var búin að þræta við mig í nokkur tíma segir hún: "Viltu gjöra svo vel að færa löppina áður en ég verð ROSALEGA REIÐ"

Úúúúúúúúppssssssssss!!!!!

En svona af því það er laugardagur og ég í sérstakelga góðu skapi (enda búin að undirbúa forrétt og gera tvöfaldan eftirrétt, á meðan Óðinn dundar við aðalréttinn ofan í aldraða foreldra mína sem koma í mat í kvöld), ætla ég að skella inn 2 myndum af gullmolunum mínum sem ég tók í morgun.

Prinsessan (sem heldur að hún sé enn einkabarn og litla bollan systir hennar)

Í eins fötum

Hin nýja húsmóðir:

2009-01-28T13:31:00.005Z

Já Eygló, ég fann einmitt þessar myndir þegar ég googlaði "housewife":

Ég ætti kannski að setja mér það markmið að þrífa aldrei eða elda nema ég líti út eins og Bree Van De Kamp, ég skoða það alla vega. Það myndi vissulega gera húsverkin skemmtilegri ;o)

2009-01-27T15:47:00.003Z

Húsmóðirin ryksugar, þrífur, þvær þvott og straujar, eldar, gefur brjóst, skiptir um bleyjur, klæðir, greiðir hár, les barnabækur, leikur í Barbie, horfir á Stundina okkar, huggar, snýtir, skeinir, verslar inn og brosir í gegnum tárin....... eða allt að því. Hún er alla vega ekki "móðir í hjáverkum" lengur, nú er þetta bara full time job og auðvelt að gleyma sjálfri sér.

Í tilefni af því hef ég ákveðið að skella ekki á mig maskara áður en ég næ í Dögun á leikskólann, svona til að toppa daginn.

Gullmoli í Köben

2009-01-19T23:37:00.003Z

Æ ef maður á ekki bara einn af flottustu frændum í heiminum!!!

Ég skammast mín ekkert fyrir myndastuld af síðunni hans því mér finnst foreldrarir engan vegin vera að standa sig í að státa sig fegurð þessa unga pilts svona opinberlega ;o)

Æ þegar maður bloggar sjaldan er eins gott að hafa e-ð frambærilegt þegar loksins verður af því og þessi stendur sko alveg undir því. Við getum ekki beðið eftir páskunum á þessu heimili, því þá fáum við að spilla honum Úlfi okkar með súkkulaðieggi og bleikri snuddu.

Hvert flaug tíminn?

2009-01-12T13:22:00.004Z

Ja hérna.

Með tvö börn virðist forgangsröðunin hafa stokkast algerlega upp. MSN, blogg og Barnalands-myndasíða er komið ansi aftarlega á listann hvað þá að kynnast undrum Facebook. Ásamt fuuuult af hlutum sem snúa að manni sjálfum.

Sei, sei já - hér með kalla ég fæðingarorlof ekki "ORLOF" heldur er ég í 100% "foreldra-vinnu". Spurning hvort það er hægt að fá álag eða yfirvinnu vegna erfiðra barna hjá Fæðingarorlofssjóði??? Ekki það að Sólin er hin ljúfasta og til fyrirmyndar..... bara stóra systir sem er á abbó stiginu góða og reynir á taugar foreldranna stanslaust ;o) En þetta hlýtur að ganga yfir að lokum.

Nýtt ár

2009-01-01T12:36:00.004Z

Gleðilegt nýtt ár gott fólk og takk fyrir allt gamalt og gott.

Maður kveður árið 2008 með trega, árið sem hún Sól kom í heiminn og svo margt annað gott gerðist. Ég man að þessi tilfinning kom líka árið 2005 þegar Dögun fæddist og mér fannst að það ár ætti að endast endalaust. En samt er ekki spurning um að það verður gaman að takast á við nýtt ár með nýjum uppákomum, óvæntum atburðum og ekki síst kaffibolla umræðum með tilheyrandi súkkulaðiáti með fjölskyldu og vinum.

Nú er spurning hver kemur í fyrsta kaffibollann... ég á enn lakkrísbitakökur ;o)

Jólamyndir

2008-12-29T00:27:00.004Z

Fyrir jólin fórum við á jólamarkað í Sláturhúsinu okkar. Þar á eftri hæðinni bauð ljósmynda-klúbburinn hér upp á ljósmyndir með Hr. Jóla. Dögun var sko hreint ekki á því að láta plata sig út í þessa vitleysum enda jólasveinninn heldur ófrýnilegur að sjá svo hún sendi Sól systur sína eina í myndatökuna.
Eftir töluverðar rökræður fékkst Dögun þó til að vera með á einni mynd með því skilyrði að Dagrún héldi á heinni og Jólasveinninn passaði Sól.

Nú er spurning hvort þetta haldi svona áfram ......................þ.e. að Dögun noti litlu systur til að kanna hættuna áður en hún ákveður sjálf að láta vaða??? Þá eru alla vega einhver not í þessu gerpi sem hefur gert sig helst til heimakomna í mömmu-faðmi.

Gleðileg jól!

2008-12-24T16:31:00.009Z

Jólastelpurnar á Lagarási 12

Gleðileg jól allir saman!

Kveðja, Steinrún, Óðinn, Dögun og Sól.

Vetrarsólstöður 21. des.

2008-12-21T23:47:00.004Z

Í dag er sá dagur ársins sem sólin er styst á lofti og á þessum tímum óska þess margir að sjá lengur og oftar til sólar. Við ákváum hins vegar að fara okkar leið og auka bara um eina sól.

Sillemú er sem sagt laus undan því nafni og hefur hlotið nafnið:

Sól Óðinsdóttir

Dagurinn passaði vel þar sem Dögun er fædd 21. júní, eða á sumarsólstöðum og því er hún akkúrat 3 og 1/2 árs í dag. Svo var matarboð hjá ömmu gulrót í kvöld og því var tækifærið notað í kreppunni svo við þyrftum ekki að splæsa í veislu sjálf og dömunni gefið nafn.

Nú eru systkinin sem sagt:
Dagur Skírnir
Dagrún Sóla
Dögun og Sól

Fyrsti pakkinn

2008-12-16T22:06:00.003Z

Sillemú barst fyrsti pakkinn í pósti sem var stílaður beint á hana.
Elsku Erla-perla, Agnes, Einar og Pípsi:

Takk fyrir góða gjöf, jólaskórnir gerast vart flottari!

2008-12-12T14:49:00.004Z

Þær systur eru hættar að vera svona líkar eins og þær voru.

Dögun með mömmsu 3 mánaða

Sillemú 5 vikna með mömmu.

Kannski ekki alveg að marka því það munar líka á aldri systranna á myndunum. En ég er ekki frá því samt að mamman hafi e-ð elst á þessum rúmum 3 árum....... hm......

Aaaaarrrrg.....

2008-12-11T15:48:00.003Z

Síminn minn datt úr vasanum í morgun án þess að ég tæki eftir því. Svo fundu smiðirnir á neðri hæðinni hann liggjandi og brotinn í snjónum í hádeginu.

Síminn sem sagt ónýtur og ég tími engan vegin að eyða pening í nýjan síma núna í kreppunni.

T630 verður sko sárt saknað - Ég er ekki viss um að ég geti lært á þessa nýtísku síma með alla sína fídusa og G3 tækni og ég veit ekki hvað......
Ég var reyndar búin að heita mér því að fá mér i-phone þegar þessi færi yfir móðuna miklu, en bölvuð kreppan sér nú til þess að svo verði ekki.
Ætli ég geti komið Óðni í trú um að hann hafi sett símann minn í þvottavélina eins og pabbi gerði með Núma síma svo hann kaupi handa mér nýjan??? .....

....hm..... líklega gengi það ekki upp þar sem hann hefur aldrei sett í þvottavélina í okkar sambúð. Spurning samt hvort hann hefur misst símann í súpuna eða í uppvaskið ;o)

Tásur og hendur fyrir ömmu gulrót

2008-12-09T11:08:00.004Z

Hér eru tásurnar hennar Sillemú í ömmuhöndum:

Hér er svo höndin hennar Dögunar í ömmuhöndum 2005:

Hér er að lokum höndin hennar Sillemú í ömmuhöndum:

Eftirlátssemi

2008-12-08T11:39:00.003Z

Þegar þessi englastelpa spyr hvort við eigum ekki að baka piparkökur saman þá getur mamman klárlega ekki sagt "nei". Þó hún sé nýbúin að hárreita sig yfir stælum og óþægð í sömu stelpu.
Því er búið að redda piparköku-uppskriftinni góðu frá ömmu gulrót og fá lánuð form og matarliti til að geta hafist handa innan skamms..... tja alla vega fyrir jól.

Hvernig verður þetta þegar þær verða orðnar tvær systurnar sem hafa vit á að blikka hvolpaaugunum framan í foreldrana til að fá sínu fram???

Mánuðnum náð!

2008-12-04T16:26:00.003Z

Sillemú er 1 mánaða í dag.

Í tilefni af því var henni skellt í notalegt bað, nudduð með Filippo Berio extra virgin olive oil, klædd í hrein föt og nýja bleyju. Hún þakkaði pent fyrir dekrið með því að kúka út um allt 5 mín seinna og þurfti því að finna nýtt dress frá toppi til táar aftur. Það verður einhver bið á næsta dekri.....

4 vikna í dag...

2008-12-02T13:45:00.004Z

...og hér passa menn sko upp á sitt og láta t.d. ekki snudduna fara langt frá sér.
Annars er daman á hraðri uppleið og stutt í að hún verði feit og sæt. Mikið ósköp er þetta fljótt að líða, fjórar vikur voru eins og fjórir mánuðir á meðgöngunni en nú þýtur allt áfram og ég rétt að fatta að það eru að koma jól. Sei, sei, já.....

Annars er fínt að vera í orlofi núna, ég lít ekki á fréttir nema mig langi til og get að mestu hundsað niðurdrepandi kreppu-fréttir. Í staðin skeini ég rassa, þvæ þvott, gef brjóst o.s.fr..... sem ég held að sé í alvöru bara miklu skemmtilegra en hitt.
Markmiðið þessa dagana er samt að fita barnið upp í 4000 g svo við komumst í göngutúr í vagninum að skoða jólagjafainnkaup og fá okkur kaffibolla eða kakó með "stro", ná í Dögun á leikskólann eða e-ð skemmtilegt. Við erum orðnar hálf leiðar að hanga svona inni allan daginn alla daga.

Systurnar

2008-11-29T23:15:00.007Z

Þó að Dögun og Sillemú séu mjög líkar að mörgu leiti er samt gaman að sjá muninn á þeim.

Á efri myndinni er Dögun 3 vikna og á þeirri neðri er Sillemú 3 vikna
- líkar en samt ólíkar -

Mér finnst samt notalegt að vita að þrátt fyrir smá vöntun á athygli hjá þeirri eldri endrum og eins, er systra-ástin klárlega til staðar.

Afmælis-prinsarnir

2008-11-28T12:48:00.006Z

2 af uppáhalds köllunum mínum (sem eru auðvitað nokkrir) eiga afmæli í dag.
Aldursmunurinn er reyndar töluverður en þeir eru nú samt góðir félagar.

Hérna eru þessir tveir einmitt saman fyrir um ári síðan.

Hérna er svo sá eldri, hann afi minn sem er 79 ára í dag.

Hér er svo gullmolinn og uppáhaldið hann Úlfur Stefán sem er 1 árs í dag
(ég viðurkenni fúslega myndastuld af heimasíðunni hans Úlfs þar sem ég á bara gamlar myndir síðan í sumar af þessu fallega barni.... og það er ekki hægt að setja inn ungbarnamynd þegar maður er orðinn 1 árs)

Til hamingju með daginn báðir tveir!!!

Settur dagur í dag.....

2008-11-24T11:47:00.006Z

Mikið er þetta notalegt. Settur dagur í dag og allt löngu búið. Enginn sem hringir að tékka stöðuna á 5 mín. fresti og ég ekki eins og fíll vem veltur um.

Á morgun verður skvísan sem sagt 3 vikna og er loksins farin að þyngjast eins og hún á að gera og ótrúlega mannaleg miðað við að hafa átt að fæðast í dag.

Mánudagar eru venjulega byrjun vinnuvikunnar hjá flestum eru þeir byrjun helgarinnar hjá okkur Sillemú. Loksins friður til að hvíla sig, Óðinn í vinnunni, Dögun á leikskólanum og ekkert sem kallar á mann að gera..... alla vega ekki fyrr en um hádegisbil.
Dögun er aðeins farin að átta sig á Sillemú er hvergi á förum og þó að sú minnsta sofi meira og minna allan daginn erum við farin að finna fyrir smá afbrýðissemi hjá prinsessunni. Hún er farin að knúsa systur síða helst til fast og atast í henni stöðugt ef ég er t.d. að gefa henni. Ég var að vona að afbrýðissemin beindist bara gagnvart okkur foreldrunum, en Dögun virðist nú samt ætla aðeins að testa systur sína....."svona gá hvað þessi krakki þolir" ;o) Þær eru alla vega ekki skildar eftir einar saman þegar sú eldri er í þessum gír. En svo er hún líka voða góð þess á milli, aðalega ef hún er orðin þreytt sem ber á því að hún er abbó 3 ára kríli sem saknar fullrar athygli foreldranna.

En stundum má samt hafa gaman af þessu skrípi sem tróð sér inn í fjölskylduna s.b.r. þessa mynd! Nú er bara spurning hver er hvað og hver á hvað?

Litla tígris-rækjan

2008-11-20T21:03:00.003Z

Sumir mannast dag frá degi, augun eru alla vega opin þó fósturstellingin sé enn í uppáhaldi.

2 vikna afmæli

2008-11-18T16:00:00.009Z

Í dag er Sillemú orðin 2 vikna. Það sem hún hefur lært á þessum 2 vikum er samt ekki mikið, hún gerir lítið annað en að drekka, sofa, gera í bleyjauna og sofa, væla pínu og sofa svo meira. Dögun til mikils ama, henni finnst þetta heldur lítilfjölbreytt líf hjá systur sinni.

Sillemú var í mælingu áðan sem er smá áhyggjuefni því stelpan hefur ekkert þyngst í heila viku og er enn 3120 g. Svo fæðingarþyngdinnni er ekki einu sinni náð aftur. En þú er bara að leggja krílið þéttar á spenann og sjá hvað setur. En á meðan hún er vær og pissar vel þurfum við ekki að hafa áhyggjur. Hún er líka ekki eins gul og áður sem er gott.

Dögun er búin að vera lasin heima síðan á laugardaginn, sem er búið að vera svolítið púzzluspil því þó hún sé óttalega góð er stutt í smá abbó-fýling. Svo er agalega erfitt að meiga ekki kyssa og knúsa litlu systur eins og áður, en við reynum að útskýra fyrir henni að það sé hræðilega vont fyrir þá litlu að smitast af hálsbólgu. Dögun sættir sig því við að kyssa hana bara á kollinn.

Stóra systir að passa

Dögun skreytti vögguna með bleikum borða, að sjálfsögðu....

Svo klæddi hún systur sína í kjól, henni fannst ekki nógu fínt að vera á náttfötunum allan daginn fyrir þá litlu, þó hún sjálf neitaði að klæða sig úr sínum.

Ekki meira í bili - brjóstabarnið kallar.......

Sú nýja

2008-11-10T19:40:00.003Z

Hún kom sá og sigraði skvísan atarna þann 4. nóv. kl 21:36.
13,5 merkur, 50 cm og höfuðmál 36 cm - alveg eins og stóra systir.

Takk fyrir allar kveðjurnar kæru vinir!

Afmælisstelpa

2008-11-04T11:52:00.000Z

Elsku, elsku Unna amma mín á afmæli í dag.

Innilega til hamingju með daginn!

02. nóv. 2008

2008-11-02T00:11:00.004Z

Í dag á aðalmaðurinn minn sannkallað merkisafmæli. Þó það hafi verið leiðinlegt að komast ekki í veisluna veit ég að hún tókst vel og Óðinn var afar ánægður með allt saman.

Ég get lítið annað gert en að senda ástinni minni 50 risa-stóra rafræna afmæliskossa.
Afmælis brunchinn sem þú áttir að fá í fyrramálið á Hótel Héraði verður að bíða betri tíma en þú átt hann svo sannarlega inni + pjening upp í bassakaup frá okkur Dögun.

Elsku kallinn minn, til hamingju með daginn, og ég tek undir með Tóta bróður þínum: þú batnar bara með árunum eins og gott viskí!

Sjúskaði sjúklingurinn

2008-11-01T15:18:00.004Z

Eftir vægast sagt ömurlega líðan síðasta rúma sólarhringinn sé ég loksins fram á aðeins betri tíma í vændum. Er búin að vera í stöðugu eftirliti, monitorun, hitamælingum, blóðprufum (er orðin meira út stunginn en slæmur fíkill), sýklalyfjagjöf, blóðþrýstingsmælingum og verkjalyfainntöku. Er sem sagt enn með meðgöngueitrun og einhverja ógeðis pest ofan í það, líklega streptókokkasýkingu en þó ekki alveg víst hvað það er, en sýking mældist alla vega í blóðprufunni. Þó ég sé reyndar langt frá því að vera orðin góð er notalegtilfinning að finna að líðanin er í rétta átt.

Hér er maður líka eins og prinsessa, allir vilja allt fyrir mann gera og ljósmæðurnar eru eins og mömmur sem hafa stöðugar áhyggjur. Ekki slæmt að hafa 2-3 mömmur í kringum sig til að stjana við mann allan sólarhringinn. Koma færandi hendi með mat, kodda, hita og kælipoka eftir þörfum, verkjalyf og klapp á bakið.

Svo eru vinir og ættingjar duglegir að fylgjast með og koma færandi hendi. Sérstakelga Ísold engill, sem fékk svo meira að segja að taka með sér óhreinu fötin mín í þvott, eftir að vera búin að færa mér fullan poka af nauðsynjavörum. Á undan henni kom svo Helga Jóna mágkona líka með smá súkkulaði og drykk. Ég verð eins og akfeit belja ef fer áfram sem horfir af öllu þessu nammi....... nú er gott að þurfa ekki að halda inni á sér maganum!

Annars veit ég lítið um framhaldið, fæ einhverjar niðurstöður á mánudaginn hvað varðar sýkinguna og á líklegast bara að vera hér áfram. Það eru hverfandi líkur á að Óðinn minn fái orminn í afmælisgjöf á morgun, en hver veit - aldrei að segja aldrei. Annars eru nægar dagsetningar til að stefna á:

Óðinn 2. nóv.
Amma 4. nóv.
Tengdapabbi 7. nóv.
Blædís 9. nóv. minnir mig
Máney þá örugglega 11. nóv.
Lóa listakona 21. nóv.
Sigríður Eir 26. nóv
Afi og Úlfur Stefán 28. nóv.

Krílið dafnar annars mjög vel og eiginlega helst til vel, mældist um 14 merkur í fyrradag..... mér er um og ó hvar það endar. Vona bara að þetta verði ekki e-ð risa barn.

Annars sendi ég kveðjur í matarboðin sem eru í gangi núna. Annars vegar "jólamatarboð" hjá Hönnu Báru þar sem ættingjar í bænum ætla að hittast og væntanlega drekka rauðvín og hafa það gott.
Hins vegar afmælismatarboð hjá ektamanninum á egilsstöðum í tilefni morgundagsins! Það er nú pínu fúlt að komast í hvorugt partýið og fá hinn kræsilega spítalamat í staðinn - en eins gott að menn skemmti sér líka fyrir mína hönd á báðum stöðum!

Over and out í bili.

Lansa-lega

2008-10-30T21:39:00.005Z

Eftir flugferð, lúxus gistingu hjá Ísold, sjúkrahúsinnlögn og spítalamat fjarri nánustu fjölskyldu kom hún Bóthildur mín loksins til mín til að deila með mér þessum tíma á Lansanum. Fyrir þá sem ekki vita er Bóhtildur Gráman mín ástæra Macintosh tölva og orðin stór partur af mér, því voru endurfundirnir dásamlegir þegar Grétar mágur tölti inn með dýrðina.

Ekki það að það sé búið að væsa um mig hér á Lansanum, hér er maður í stöðugu eftirliti og umhyggju góðs fólks, bæði starfsfólks og ættingja/fjölskyldu sem kíkja við og koma færandi hendi. Ísold kom með nammi og töskuna mína (og fær feitan plús í kladdan fyrir að bera hana alla leið til mín, þessir Breiðdælingar láta ekki að sér hæða þegar um krafta er spurt), tengdó komu svo með slúðurblöð og gos, Grétar kom með kókómjólk og kex sem Stína reddaði fyrir mig svo ég myndi ekki svelta aftur í nótt eins og þá síðustu og auðvitað tölvuna og aðra hluti sem Óðinn og pabbi voru búnir að redda út á flugvöll á Egilsstöðum........ Sem sagt, þó að maður liggi bjargarlaus og feitur inni á spítala snýst heimurinn enn um rassgatið á manni! LJÚFT!

En annars veit ég lítið enn um stöðuna, var rétt í þessu að fá mældan blóðþrýstinginn sem var hærri núna en áður...... eins gleðilegt og það nú er. Það á að skoða málið á morgun.

En eitt er alla vega ljóst að ég kem ekki austur aftur fyrr en eftir að vera búin að kúka krakkanum í heiminn. Svo dekurdvöl á Norðfirði er út úr myndinni en þó gleðilegt að vera í öruggum höndum og stuttu færi frá fæðingardeildinni þegar þar að kemur, engar ófærar heiðar og göng á leiðinni.
Svo hvílist maður ótrúlega vel hér, enda getur maður ekki stolist til að gera neitt eins og: elda mat, fara í Bónus, sækja Dögun á leikskólann, setja í þvottavél, baka, aðeins að ryksuga, þurrka af eða skúra............ Svo þetta er eins konar húsmæðraorlof þó að oft sé stutt í smá geðshræringu þegar ég hugsa heim til prinsessunar og eiginmannsins. En allt tekur enda um síðir og vonandi þurfum við ekki að bíða of lengi eftir Sillemú.

Ein Photo Booth mynd af okkur Dögun á góðri stundu fyrir skömmu.

Árs afmæli

2008-10-27T18:30:00.002Z

24. okt. 2007 setti ég fyrstu færsluna inn á bloggið. Nú rétt rúmu ári seinna er ég að velta fyrir mér hvort ég eigi að halda þessu áfram. Ég held þó að ég myndi sakna þess ef að ég gæfi bloggið alveg upp á bátinn, betra er að blogga bara eftir hentugleika og nennu en að hætta alfarið að blogga.

Eða hvað segja menn?

Ég ætlaði samt að læsa blogginu um daginn en var ekki nógu klár til að finna út hvernig ég færi að því, en um leið og ég kemst að því er líklegt að ég muni setja inn lykilorð á síðuna, sérstaklega með það í huga að óðum styttist í nýjan fjölskyldumeðlim. Myndum og sögum um það umræðuefni mun sennilega fjölga á komandi mánuði og aðalega hugsað fyrir fjölskyldu og vini.

Á nagladekkjum til Norðfjarðar.

2008-10-22T11:22:00.005Z

Skoðuðum fæðingardeildina á Norðfirði í gær og leist bara ágætlega á - voða heimilislegt. Svo er bara að sjá hvort við náum niður eftir þegar á reynir. Hvað vorum við að hugsa með að eiga barn í nóvember á austurlandi???
En í þessari ágætu ferð fórum við í mat til Dagrúnar og fengum þvílíkar kræsingar, ég er enn að blóta því að hún búi í klukkustundar fjarlægð frá okkur því annars væri ég mætt í heimsókn að borða afganginn af súkkulaðikökunni síðan í gær.
Dögun fékk að vera eftir hjá Systu á meðan foreldrarnir skruppu á deildina, og var afar ánægð með það. Enda fékk hún að fara í stóra baðið og synda eins og hafmeyja. Þær tvær eru strax búnar að plana dekur daga þegar Sillemú mætir á svæðið.

Leti.

2008-10-14T09:56:00.002Z

Ég nenni engu þessa dagana..ENGU! Ekki einu sinni að sitja á rassinum og koma með gáfulegt blogg, ég skrifa það á Sillemú.

Bleyjutal.....

2008-10-08T17:55:00.004Z

Á þessum síðustu og verstu tímum komu taubleyjurnar loksins í hús. Ég ákvað að reikna hvað þær hefðu hækkað miðað við gengið frá því að ég pantaði þær er USD var í 87 kr. Mér reiknaðist að þær hefðu kostað mig 12.000 kr meira í dag en fyrir rúmum mánuði síðan. Eins gott að ég var óþolinmóð og ákvað að panta strax, sérstaklega með það í huga að pappableyjur munu örugglega hækka töluvert eins og annar innfluttur varningur á næstu dögum.

En svo lengi sem að rafmagnsreikningurinn hækkar ekki mikið þá ættum við að koma út í feitum plús með þessum framkvæmdum, þó svo að þvottaefnið muni hækka smá.

Nú er ég að herða mig upp í að setja allt í þvott áður enég freistast til að skila öllu saman með miðunum á.

Við Dögun viljum senda okkar ástkæra Úlfi baráttukveðjur í tilefni af því að hann er með ælupest í Köben, væri samt freistandi að fá hann lánaðan á Klakann til að æla yfir allt þetta krepputal og ruglástand.
Verð líka að benda á skemtilegt myndband sem Harpa mágkona bendir á á sinni síðu. Ætli við missum ekki allt ef húmorinn tapast.

Sú heppna.

2008-10-08T11:43:00.004Z

Kreppan truflar marga núna en þó ekki hana Dögun sem græddi á tá og fingri í gær. Dagur kom heim úr interrail og færði litlu systur pakka.

Dögun, sem er búin að klæðast Línu langsokk búning hér heima við 2 síðustu daga, var afar sátt með að fá bróður sinn heim, enda búin að bíða lengi eftir að komu hans því hún var alveg viss um að hann væri í útlöndum að kaupa handa sér Manchester búning (en enginn veit hvaðan hún fékk þá hugmynd). En hún segist halda með þeim eins og Dagur og búin að tilkynna honum í símann að hana langaði í búning.
Dagur sveik sko ekki litlu systur með það og upp úr pokanum kom þessi flotti alvöru Manchesteer búningur, Signoritu kjóll og nammi! Eitthvað segir mér að hann verði í guðatölu næstu dagana, enda fékkst Dögun ekki úr fótboltabúningnum í gær og svaf því í honum í nótt.

Litla Signorita Dögun

Eitthvað annað segir mér líka að Stefán afi Liverpool aðdáandi og Stefán Númi Arsenal frík eigi eftir að segja e-ð við liðsvalinu hjá Dögun.

Við foreldrarnir höfum hins vegar engar áhyggjur af þessu og smjöttum bara á góða súkkulaðinu sem við fengum og lofum öðrum að sjá um að ala upp íþróttaáhugann hjá barninu.

Norska prinsessan.

2008-10-04T11:44:00.003Z

Fundum þennan kjól af Önnu Guðlaugu inni í skáp um daginn. Hann smellpassar á Dögun núna og er afar hentugur í kuldakastinu hér hjá okkur.

Nýjar myndir

2008-10-03T23:48:00.003Z

Loksins komnar myndir á barnalandi - júní til september 2008. Sko mig!
Samt ákvað Barnaland að vera með vesen og loka öllu vefsvæðinu í dag, loksins þegar ég hafði tíma til að setja inn myndirnar. En þeir opnuðu aftur að lokum um 16:30 svo nú á allt að vera komið inn.
Bumbumyndir og svoleiðis mun svo vera væntanlegt og í tilefni af nýrri bumbu og verðandi barni hef ég skipt um lykilorð. Þá er bara að sms-a á mig eða senda mér tölvupóst til að fá uppgefið hvað það er.

Morgunkaffið

2008-10-03T12:07:00.002Z

Það er fátt eins notalegt og að heyra expressokönnuna á eldavélarhellunni krauma, til merkis um það að fyrsti kaffibolli dagsins sé í nánd. Og ekki er lyktin sem fylgir verri...........

Svaðilför og Seyðis

2008-10-01T12:25:00.004Z

Fórum í sónar á Seyðisfjörð í morgun í slyddu til að byrja með, svolítilli hálku og svo snjókomu á Fjarðarheiðinni. Veturinn er sem sagt kominn hvort sem okkur líkar betur eða verr.

Eins gott að fara að setja naglana undir "kerruna" ef maður á að komast yfir fjallvegi í nánustu framtíð.

Nú er svo bara rigning og rok úti og mig langar mest að fara heim, skríða upp í rúm og leggjast í dvala í svona eins og 8 vikur. Vakna svo hress og endurnærð, helst með krílið í fanginu.

Meiri bakstur.

2008-09-29T14:46:00.005Z

Ég bakaði finnskt bláberjapæ í gær og bauð gráðugum foreldrum í kaffi. Kakan spændist upp (fyrir utan eina sneið sem enginn þorði að klára....... nema ég þegar allir voru farnir) svo hún hlýtur að hafa fallið í kramið hjá öllum.

Uppskriftin er mikið hernaðarleyndarmál...... en þeir sem geta lagt fram væna summu geta hugsanlega fengið hana senda á e-mail.

Annars var helgin tíðindalaus. Óðinn var á veiðum frá föstudegi fram á laugardag og við Dögun því einar í kotinu. Amma gulrót og Númi nutu því góðs af því og fengu að hafa okkur í mat á föstudagskvöldið því afi gamli var á Djúpavogi að djamma.

Kíktum til Árna og Erlu á laugardagskvöld, þeirri litlu til mikillar gleði enda var mikið stuð á þeim frændsystkinum Óðni Skúla og Dögun og þau komin í búninga undir lokin og farin að dansa við Queen o.fl.... Við sofnuðum svo seint að íþróttaskólinn var um það bil að byrja þegar við opnuðum augun á sunnudagsmorgni og var því ákveðið að skrópa í þann tíma. Dögun var afar sár þegar hún fattaði það, en henni var LOFAÐ að við myndum fara næst.

Nú er svo bara óttalegur mánudagur í loftinu, rigning og þungbúið. Sillemú sparkar óendanelga mikið þessa dagana (og næturnar) og má þakka fyrir að ég takist ekki á loft á köflum. Þetta er ekki ég, en svona er ástandið samt!

Miss MALM

2008-09-24T11:03:00.006Z

Eftir viðureign mína við nýjasta húsgagn heimilisins hef ég ákveðið að Óðinn fái að setja saman öll húsgögn á heimilinu fram að fæðingu. Eftir 3 tíma vinnu með skrúfjárni og hamri, ásamt því að elda ofan í barnið, baða það og svæfa, þurfti laaaanga heita sturtu og verkjatöflur til að ná mér niður. Ég vaknaði svo í morgun með bjúg sem ég er klárlega ekki tilbúin að sætta mig við næstu 8-9 vikurnar!

Prinsessan á heimilinu var samt mjög spennt yfir þessu öllu og fannst við foreldrarnir ættum að kaupa nýja kommóðu handa henni líka, en að sjálfsögðu bleika...... og með Hello Kitty. Ikea framleiðir að vísu bleikar MALM kommóður, en ætli þær fáist eins og þessi???:

Stjörnuspá dagsins 19. sept 2008

2008-09-19T09:01:00.005Z

Tvíburar: "Þú óskar þess að þú gætir komið á skipulagi og að það myndi endast að eilífu. Því miður tekur líf þitt stöðugum breytingum og þú þarft að betrumbæta þig."

Ansans - ég sem var að vona að eftir endurskipulagningu og þrif á heimilinu myndi það allt saman endast að eilífu.

Sporðdreki: "Þú þráir athygli. Stígðu á svið lífsins og haltu sýningu. Þú hressir heldur betur upp á liðið sem var farið að taka hlutina alltof alvarlega."

Svo á meðan ég þarf að endurskipuleggja og beturumbæta mig fær Óðinn að fríka út og skemmta öðrum - er þetta nú hægt???

Dögun fer í bað....

2008-09-18T16:42:00.004Z

Eins og Dögun fannst nú gaman í baði þegar hún var yngri er orðið nær ómögulegt að koma henni í sturtuna á kvöldin. Eftir mikinn eltingarleik um húsið tekst það þó yfirleitt. En stundum þarf að beitabrögðum og þá er oft dregin fram IKEA balinn góði og stóra 3 ára stelpan fer í ungbarnabað og unir sér vel.

Hins vegar er það líka þannig að þegar hún er loksins komin í bað eða sturtu ætlum við foreldrarnir aldrei að ná henni upp úr. Hún getur setið og leikið sér í sínum eigin heimi tímunum saman undir bununni og er hundfúl þegar á að veiða hana upp úr.

Merkileg þessi börn!

Íþróttaskóli, málning, IKEA og prjónaskapur

2008-09-18T08:52:00.016Z

Á sunnudagsmorguninn byrjaði Dögun í langþráðum íþróttaskóla. Þetta átti sannarlega vel við hana og hún telur dagana þar til hún má mæta næst. Meira að segja laugardagurinn (nammidagur) fellur í skuggan af hinum mikla íþrótta-sunnudegi.

Eftir tímann fórum við og keyptum málningu í Húsasmiðjunni til að mála hjá okkur holið/borðstofuna. Dögun fór alsæl í pössun til ömmu og afa og langömmu og langafa á meðan foreldrarnir máluðu. Það var eiginlega ekki hægt annað það sem hún var heldur hjálpsöm við málninguna, var jafnvel farin að krefjast þess að borðstofan yrði máluð bleik. Þetta málningarævintýri endaði svo þannig að það þurfti að hefla, sparsla og pússa skemmdan vegg, mála 2 umferðir á allt og pensla 3x. Svo þegar allt var orðið hvítt og fínt sást hversu hurðarkarmarnir voru mislitir og illa blettaðir í gegnum árin með mismunandi málningu. Það var því tekið á það ráð að mála alla hurðarkarma sem snúa inn í borðstofuna með fínu panillakki (3 umferðir á hverja) + borðstofugluggann, baðherbergisgluggann (sem var farinn að flagna), baðherbergishurðarkarminn og karminn í forstofunni. Við erum því eiginlega enn að þó nú sjái loksins fyrir endann á ævintýrinu.

Í gærkvöldi gátum við svo loksins farið að raða upp hillum og skápum á sinn stað, og auðvitað þurfti ég að breyta til og fá Óðinn til að klöngrast með bókahilluna á milli veggja (ekki gat ég gert neitt með bumbuna út í loftið, enda búin á því eftir bogur við málninguna síðustu daga). Svo þurfti að raða bókunum skilmerkilega í hilluna. Ég sjálf hefði raðað þeim eftir stærð, lögun og litum...... en sei, sei nei, höfundar þurftu að vera saman, erlendar skáldsögur sér, ljóðabækur sér, íslenskar skáldsögur sér, uppskriftabækur sér (ég studdi það reyndar), goðafræði og íslendingasögur í eini hillu.....o.s.fr..... Bókauppröðun tók því lungann úr kvöldinu og því var lítið annað gert. Þrif og frágangur er því mikið til eftir. Ég hengdi þó upp gardínurnar aftur til að nágrannarir í elliblokkinni á móti gætu farið að lifa eðlilegu lífi og hætt að þurfa horfa upp á okkur á brókinni í flennistórum glugganum.

Nú er svo komið að því að hringja í okkar ástkæru IKEA búð og panta kommóðu og annað smálegt áður er skrípið kemur í heiminn. Eins mikið og ég elska IKEA er ég ekki sátt við þessar hækkanir hjá þeim.

En að örðu.

Peysan mikla kláraðist á föstudaginn var og hamingjan ríkti í 2 tíma, eða allt þar til Sessa vinkona sendi mér myndskilaboð þar stóð: "Peysan er tilbúin!" ásamt mynd af einhverri þeirri fallegustu ungbarnapeysu sem ég hef séð. Stúlkan atarna var sem sagt að prjóna/hekla peysu á Sillemú og það líka þetta meistaraverk.

Peysan mín:

Peysan hennar Sessu:

Ég hef samt ákveðið að láta ekki deigan síga þrátt fyrir einfaldleika peysunnar minnar, einhversstaðar verður maður að byrja og Sessa hefur u.þ.b. 16 ára forskot í þessari keppni eða meira. Mamma man enn þegar við stöllur sátum við eldhúsborðið heima með handavinnuverkefnið sem þá var í gangi í handavinnu. Sessa var að sjálfsögðu löngu búin með sitt og farin að prjóna barnapeysu, ég sat hins vegar sveitt við hverja lykkju og vældi. Mig minnir að verkefnið hafi verið prjónaður bolti. Gott ef minn bolti skoppaði ekki bara vel, enda orðinn þæfður og þéttur eftir átökin. Ætli við höfum ekki verið svona um 9-10 ára þarna.

Allt að koma og helgin framundan.

2008-09-12T11:22:00.005Z

Dögun laslingur er öll að koma til. Hún var hitalaus í gær og nokkuð hress fyrir utan væl og tilætlunarsemi sem hún fann að hún komst upp með á meðan hún var lasin, en gerði sér svo vonir um að geta notað áfram eftir það...... en sei, sei nei! Nú verður sko sagt STOPP! Hér eftir verður skorið á alla lúxus þjónustu og undanþágur frá hinum venjulegu reglum heimilisins.

Enginn matur uppi í rúmi
Engin hlaup foreldrana fram og aftur heilu næturnar til að sinna óskum prinsessunnar
Engin tjaldútilega í stofunni
Enginn ís 3x á dag
Og síðan en ekki síst: STRAFF Á DÝRIN Í HÁLSASKÓGI sem eru búin að ganga 4x á dag í 5 daga í tölvunni minni! Fínt leikrit....en sannarlega ekki í þessu magni!

Á meðan Óðinn skrapp út í sveit í gærkvöldi að gera að fuglunum sem þeir bræður höfðu veitt, elduðum við Dögun okkur ódauðlega hamborgara. En okkur leiddist eftir það svo við ákváðum að gera aðra tilraun með ostakökuna góðu og hafa í henni bláber að þessu sinni. Hún varð ekki eins góð og hindberjakakan en þrælfín samt. Dögun fór svo í pössun í morgun til Ollu (þar sem leikskólinn er lokaður) iðandi í skinninu af spenningi og færði henni Bláberja-ostaköku með morgunkaffinu. Eitt það besta sem Dögun gerir, fyrir utan að hitta Systu sína, er að fara í dekurheimsóknir til Ollu, Kjartans og Kastrós. Enda ætlaði gærdagurinn aldrei að líða hjá þeirri stuttu þar sem hún vissi að morgundagurinn fæli í sér heimsókn í græna húsið.Hinn helminginn af kökunni stefnum við svo á að færa Eddu prjónakonu eftir hádegið þar sem verður lögð lokahönd á peysuna miklu. En það á eftir að prjóna stykkin saman og sauma svo hliðar og ermar. Þetta er sem sagt allt að koma.

Ines ætlar svo að kíkja í pössun fram yfir kvöldmat þar sem Kati ætlar að læra á afródans og að þessu sinni er ég betur fallin til að passa fyrir hana en að fara með henni að dansa með bumbuna út í loftið.....

Í kvöld er svo stelpu matarboð hjá Erlu perlunni minni, hlakka óneytanlega til að hitta bekkjarsysturnar sem gerist æ sjaldnar þessi síðustu ár. En er alltaf jafn gaman og alltaf líður manni eins og við hittumst á hverjum degi. Ómetanlegt að eiga góða vini!

Góða helgi!

Laslingur

2008-09-08T15:34:00.011Z

Stundum getur komið sér vel að vera heima með lasið barn, þó auðvitað sé ekki gott fyrir barnið að líða illa þá er um að gera að gera það besta úr því.
Eftir að hafa unnið fram að hádegi fór ég heim úr vinnu og ákvað að nýta hindberin í ísskápnum sem við tíndum í Hallormsstaðaskógi í gær, ásamt sólberjum, hrútaberjum og bláberjum í hreint yndislegu veðri með mömmu og pabba... verst að myndavélin gleymdist heima. Ég tók mig sem sagt til og skellti í eina ostaköku með ferskum hindberjum. Ég hef aldrei gert ostaköku áður og fann á netinu einhverja grunnuppskrift og bætti svo við hana því sem mig lysti. Inga bankamær og Kristín sláturhúsgella kíktu svo í kaffibolla og köku á milli vinnutarna áðan.

Botninn:

1 og 1/2 hafrakexpakki (frá Frón)
170 g smjörklíki brætt, en ekki látið sjóða

Fylling:

350 g rjómaostur
tæpur 1/2 l af rjóma (þeyttur)
1 lítil dós af hindberjaskyri
3 dl flórsykur
dass af vanilludropum
1-2 dl af ferskum hindberjum

Myljið kexið í botninn og blandið svo smjörlíkinu út í, setjið í botninn á fallegu móti eða skál.
Þeytið rjómann í sér skál.
Blandið svo vel saman rjómaosti, skyri, vanilludropum og flórsykri þar til blandan er laus við kekki. Því næst er rjómanum blandað varlega saman við og loks hindberjunum (geymið þó nokkur til að skreyta með á eftir). Blöndunni er svo smurt vel ofan á kexbotninn og látið í kæli í a.m.k.2 klst.

OG VUOLA......... tilbúin til átu!

Það er eitthvað svo mikill uppskerutími í loftinu þessa dagana. Óðinn fer á gæsaveiðar, við tínum ber og búum til hlaup og sultur, ég prjóna, bumban stækkar, Dögun þroskast, meira að segja baselikumplantan í glugganum er upp á sitt besta. Svo er veðrið ekki af verri endanum eins og er.

Lobba.

2008-09-07T10:23:00.007Z

Á föstudaginn fékk Dögun sérdeilis góða gjöf. Dísa Hörpumamma kom færandi hendi með drauma lopapeysuna. Dögun er alsæl með gripinn og finnst hún voðalega fullorðin þegar hún er komin í peysuna. Hún var orðinn hálf abbó yfir peysunni sem mamman rembist við að prjóna á Sillemú, og var því eitt sólskinsbros þegar ég sagði henni að Dísa hefið prjónað þessa peysu sérstaklega handa henni. Það kom smá hik og svo sagði sú stutta: "Hún Dísa er svo góð!"

Takk fyrir peysuna Dísa!

Mamma, pabbi og Númi komu svo í mat í gær á meðan Óðinn stakk af á gæsaveiðar með bræðrum sínum. Á meðan var tilraunaeldamennskan í fyrirhúmi og ég held að hún hafi tekist ágætlega til, alla vega kvartaði enginn.

Fetaosta, Höfðingja og basilikumfyllt kjúkklingabringa vafin í bacon með salti og pipar
kartöflusalat með avocado, döðlum, furuhnetum, ólífum, limesafa, sýrópi, basilikum, maldonsalti og rósmarín
Rucolasalat með vínberjum, rifsbejum og sólberjum úr garðinum
Hvítlauks-ólífuolíudressing með karrý, sinnepi, salti og sítrónusafa

Að vísu vantaði rauðvínið með, en það fannst ein flaska af Bluch í ísskápnum sem fékk að fljóta ofan í þá sem höfðu aldur til og voru ekki bumbufylltir með barni. Hver segir svo að yfirkokkurinn á heimilinu þurfi alltaf að vera á staðnum til að elda? ;o)

Móðir náttúra.

2008-09-04T12:05:00.009Z

Eftir bleyju-notkun Dögunar og öllum þeim peningum sem fóru í hana og ruslapokum fullum af bleyjum og ólykt, ákvað ég að nú skyldi verða breyting á! Með þetta kríli ætla ég að prufa að nota taubleyjur. En nú var úr vöndu að velja...... eftir margar kvöldstundir á netinu yfir mörgum típum og gerðum af taublejum pantaði ég 3 stk í júlí til að fá svona nasaþef af því sem biði mín. Mér leist vel á þessar bleyjur þó þær séu ekki beint gefnins en var í vafa með hvort ég ætti að týma að splæsa í bleyjur sem koma í stöðluðum stærðum eða bleyjur sem stækka með barninu og endast því alla bleyju-gönguna, en eru kannski ekki eins góðar fyrir nýfædd kríli og minnsta gerðin.
Síðari kosturinn er að sjálfsögðu mun ódýrari þar sem ég get notað sömu 15 bleyjurnar allan tímann, í staðinn fyrir að þurfa að endurnýja bleyjurnar 3x (S, M, L) þegar barnið stækkar og kaupa því alls um 45 stk.
Þegar ég fór að kíkja á verðmuninn á Íslandi og í USA brá mér heldur en ekki í brún. Með því að kaupa bleyjurnar erlendis frá og fá að senda þær á frænda Óðins í New York sparaði ég samtals 24.500 kr. eða um helming miðað við að kaupa þetta af sölumönnum hér. Þrátt fyrir að vilja styrkja þessar góðu konur sem standa í innflutningi á taubleyjum og tengdum vörum gat ég ekki annað en keypt þetta erlendis frá.

Ég var s.s. að fjárfesta í 15 stk. af taubleyjum á Sillemú svo nú verður ekki aftur snúið!

Umhugsunarefni um þetta mál:

Ættu taubleyjur að vera skatta og tollfrjáls varningur ?- hvað ætli Ríkið spari við urðun sorps ef allir foreldrar notuðu taubleyjur á börnin sín? Sérstaklega hér á landi þar sem rafmagnskostnaður er frekar ódýr og því ekki eins dýrt að setja í þvottavélar hérlendis og annarsstaðar.
Hvað ætli kostnaður við urðun sé á einni bleyju? Fyrsta framleidda pappableyjan er ekki einu sinni orðin að mold í dag því það tekur hverja bleyju um 500 ár að eyðast í umhverfinu.
Af hverju eru foreldrar ekki upplýstir betur um taubleyjunotkun t.d. af sínum sveitafélögum og jafnvel styrktir um nokkrar bleyjur til að minnka urðun á svæðinu? Hvert fóru "Grænu sveitafélögin"?
Mér reiknaðist til að við værum að spara í kringum 200 þús. kr með því að nota taubleyjur í 3 ár í staðinn fyrir pappírsbleyjur. Pakkaverð á pappírsbleyjum hefur meira að segja hækkað töluvert síðan Dögun hætti með bleyju. Þó svo að lágmarks start-kostnaður á taubleyjum (þessum nýju tegundum) sé a.m.k. 30-40 þús. Það er örugglega hægt að komast af með minni upphafs kostnað ef notaðar eru gömlu gas/ælu/taubleujurnar með plasti yfir.
Hefur einhver efnagreint pappírsbleyjurnar? Hvaða efni erum við að láta liggja upp við viðkvæma húð barnanna okkar 24 tíma á dag vætta í hlandi?
Sem betur fer eru taubleyjur að komast í tísku, alla vega hér á Íslandi og þykir nú flottast að vera með barnið í sem náttúrulegustum taubleyjum, og vegna úrvals af gerðum, litum og munstrum er voða gaman að versla svona bleyjur.

Hmmmm...... nú er eins gott að ég endist í taubleyjuþvottinum þegar alvaran tekur loks við! Eins gott að Óðinn sé tilbúinn að sparka í rassinn á mér þegar ég spyr sjálfa mig hvað ég hafi verið að pæla með þessum kaupum. En vonandi á þetta eftir að komast fljótt inn í rútínuna. Þetta er spurning um 1 auka þvottavél daglega eða anna hvern dag. Svo verður kannski mikið sport fyrir 3 ára heimasætuna að brjóta saman litríkar taubleyjur fyrir foreldra sína.... hver veit?

Á von á þríburum 59 ára gömul

2008-09-04T11:52:00.002Z

Svo er ég að kvarta yfir meðgöngunni og er bara 25 ára með eitt barn í bumbu- hvernig ætli þessi muni hafa það næstu mánuði?

Bílalán.

2008-09-02T09:44:00.003Z

Ó hvað þetta er kunnuglegt!

Ofur húsmóðirin

2008-08-28T13:49:00.006Z

Ég hef grun um að hreiðurgerðin sé farin að fara með mig strax og þó bara komin um 28 vikur á leið.

Undarleg þrifþörf hefur gripið um sig og mig langar alltaf að vera að laga til, breyta og lagfæra allt í kringum mig, kaupa vellyktandi gólfsápur í BESTA, safna einföldum og hollum uppskriftum, búa til berjahlaup, en vegna ástand míns hefur reyndar ekki allt komist í verk enn, blessunarlega Óðins vegna. En löngunin til að hafa allt ógurlega fallegt og flott er að fara með mig, sérstaklega þar sem ég get ekki gert þetta allt sjáf, kannski það sé líka haustlyktin í loftinu ásamt nýja IKEA bæklingnum sem gera þetta að verkum. Mann langar bara til að "hygge sig" við kertaljós uppi í sófa og prjóna..... JÁ, prjóna! Ég er nefnilega að reyna að ala upp í mér prjónadelluna með hjálp góðra vinkvenna. Mín tók sig til og keypti garn í eina ungbarnapeysu um daginn og er strax búin með bakstykkið og byrjuð á vinstra framstykki. Ekki það að þetta þyki merkilegt afrek á mælikvarða prjónafólks, en ég er stolt og sama hversu misheppnuð og ljót peysan verður, krakkinn (Sillemú) skal sko fá að nota hana ef mér tekst að ljúka henni.

Með hjálp góðra aðstandenda tókst mér líka að fjárfesta í nýju rúmi án vitundar eiginmannsins. Þegar hann kom svo heim úr vinnunni í gær beið eftir okkur full borðstofa að rúmpörtum sem þurfti að setja saman. Við fórum létt með það og létum fara vel um okkur í nýja Tempur Spring Air rúminu okkar í nótt. Þó það sé alltaf draumur að skríða upp í rúm á kvöldin hefur það sjaldan verið jafn gott og girnilegt og í gærkvöldi, vitandi það að við erum fyrstu mannerskjurnar sem sofa í rúminu (vonandi), sökkva í tempurdýnuna og loka augunum. En ég verð reyndar að viðurkenna að ég lagðist ekki strax til svefns...... það var ekki fyrr en eftir nokkrar prjónaumferðir sem ljósið var slökkt og ég lagðist niður. En ég get þá líka vottað það að prjónaskapur og Tempur fara ákaflega vel saman! En mér á hinn bóginn líður orðið eins og gamalli baðstofu kerlingu með prjónana við rúmstokkinn.

Sennilega er ég vel til þess fundin að falla inn í undirheima prjónsins!!!

Föstudagur

2008-08-15T13:25:00.003Z

Ormsteiti að byrja og í kvöld er stefnt á Hverfahátíð og alvöru Karnival með svakalega flottum búningum. Þessu má enginn missa af!!!

Dögun er hin spenntasta og búið að lofa henni að fá ljósa armbönd og hálsfestar til að bera þegar skyggja fer.
Það eina sem veldur mér áhyggjum að litur okkar hverfis er GULUR og eiga menn að klæðast þeim lit í tilefni af því á grillinu. En ég fór yfir fataskápa heimilisins í hádeginu og fann bara eina gula flík:
Skærgulan Malarvinnslubol sem ég fékk á blakmóti fyrir löngu. Nú eru góð ráð dýr, við erum jú 3 í heimili og allir verða að skarta gulu. Ætli ég endi ekki á að klippa niður bolinn fína og búa okkur til hárbönd eða trefla, það er bara spurning hvort Blædís og Doddi fyrirgefi mér skemmdirnar á bolnum fína. En vonandi erfa þau það ekki við mig þar sem þau eru búin að selja fyrirtækið. Menn verða nú að fórna sér fyrir hverfið og blessunarlega eru þau á Hörgsási 6 líka í gula liðinu með okkur Lagarásbúum.

ÁRFAM VIÐ!

Vuola!

2008-08-11T20:24:00.004Z

Skelli inn einni mynd af ofur-bumbunni eftir nokkrar áskoranir/kvartanir ;o)

Hér eru komnar um 25 vikur

Til gamans set ég inn eina mynd af mér komnar 35 vikur með Dögun/ fyrsta barn:

Er furða að maður haldi að krílin séu 3 þarna inni???

Komin aftur til vinnu.

2008-08-11T09:59:00.007Z

Jæja, einhvern vegin er það þannig að þegar maður hefur frá mestu að segja nennir maður ekki að blogga um það eða hefur hreinlega ekki tíma í það.

Sumarfríið leið allt of hratt sem og dvöl Úlfsins og Co. á landinu, en þau flugu aftur til Köben í gær.

Fríið einkenndist af leti og meiri leti. Þó var hitt og þetta smálegt framkvæmt samhliða letinni. Hæst stóð þó uppúr þriggja nátta útilega á Borgarfirði eystri um Bræðsluhelgina og Verslunarmannahelgar-game á Eiðum, auk almennra hittinga með skyldfólki úr báðum ættum.

Annars nenni ég ekki að tíunda fríið meira þar sem ég sakna þess að vera ekki í lengra fríi, en það er nú ekki langt í að ég þurfi að bregða mér aftur frá vinnu til að sinna annars konar störfum. Alla vega er leigandinn framan á mér í stöðugri stækkun og ég veit ekki hvar þetta endar með þessu áframhaldi. Mig er farið að gruna að það séu a.m.k. 3 leigendur þarna inni miðað við læti og fyrirferð. Ef leigutíminn er til 24. nóvember eins og áætlað er, held ég að Óðinn verði farinn að teyma mig um í bandi eins og risastóra gasblöðru áður en langt um líður. Ég verð svo útblásin að ég á ekki eftir að geta hreyft mig úr stað af sjálfsdáðum innan örfárra vikna.

Kannski þetta verði þrjár Dögunir í viðbót???

Update:

2008-07-09T18:22:00.024Z

Margt búið að gerast síðan...tja.... 21. júní.
Einkadóttirin hélt fína veislu í tilefni afmælisins og daginn eftir var annar í veislu haldinn hátíðlegur þegar Jóhanna Kolbrörg frænka kom í kaffi og bauð svo í heitapottinn á Hörgsásnum. Svo komu amma gulrót, afi og Númi í kvöldmat eftir reisu til Köben.Djazzhátíðin var sótt heim og tókst afar vel til.

27. júní var leikskólaveisla með hoppuköstulum, þrautum og pulsupartíi.
28. júní fórum við Óðinn í æðislegt brúðkaup í Hallormasstaðaskógi, þar sem Edda og Loftur voru gefin saman af sýrslumanninum með pomp og prakt. Á meðan fór Dögun í sveitina til ömmu, afa, Bleggeddu og Co. og gisti þar eina nótt. Hún lifir enn á því stúlkan atarna.
5. júlí var bongóblíða á Egilsstöðum og við nutum sólarinnar í botn. Hvort sem var á mánatröð, í skóginum eða á Lagarásnum.
6. júlí kom svo Úlfurinn og Co. og heiðraði okkur með nærveru sinni. Annar eins gullmoli er vandfundinn og sjá frænkur, frændur, ömmur og og afar ekki sólina fyrir blessuðu barninu, enda afar vandað og gáfulegt eintak þar á ferð. Að ekki sé talað um bláeygt úr hófi fram!
7. júlí fórum við svo að hitta fósturdótturina á Norfirði þar sem hún eldaði þennan snilldar mat fyrir okkur. Við borðuðum svo mikið að við bíðum þess enn ekki bætur. Dögun var þó ekki sátt með að skilja Systu sína eftir þarna í óþekktum bæ og grét sáran þeta við kvöddum.
TAKK FYRIR MATINN DAGRÚN!

Leti

2008-07-03T12:44:00.006Z

Þó að ég hafi gert fuuult af skemmtilegum hlutum undanfarið, þá hef ég ekki haft tíma eða orku til að blogga um þá. En það stefnir í betri tíma með blóm í haga, ég er nefnilega á leið í sumarfrí eftir morgundaginn og mun þá vonandi hafa tíma til að segja frá ævintýrum undanfarinna daga/vikna með myndum og öllu tilheyrandi.

Ég s.s. tel niður mínúturnar í fríið þessa stundina, en um leið og ég er farin í frí mun ég telja niður mínúturnar í komu Úlfsis og Co. til landsins þann 6. júlí.

Frænkan verður sko urrrrandi glöð þegar þessi mætir á Klakann!

Ljúffengt

2008-06-24T12:05:00.005Z

Þó mér sé málið skylt verð ég að benda á þennan ótrúlega girnilega matseðil hjá fósturdótturinni á Hótel Eddu á Neskaupsstað. Við Óðinn stefnum alla vega klárlega á að mæta við fyrsta tækifæri og njóta þess að eta á okkur gat af kræsingum ala Dagrún kokkur!

Mmm.....

Forréttir

Súpa dagsins

Beikonvafinn hörpudiskur

Reyktur og grafinn lax

Mozzarella og tómatar

Djúpsteiktur camenbert með mangochutney og sultu

Aðalréttir

Kjötréttir:
Kjúklingur m/marmelaði og myntu

Andabringa m/kirsuberjasósu

Lambafille m/villisveppapiparsósu

Fiskréttir:
Þorskhnakkar m/ólívum og kirsuberjatómutum

Silungur m/mangó chutney og pistasíu hnetum

Saltfiskur m/lime döðlum og tómötum

Meðlæti; Annaðhvort hrísgrjón eða kartöflur dagsins

Grænmetisréttir

Gulrótarbuff m/kaldri hvítlaukssósu

Matarmikið kjúklindabaunasalat m/heilhveiti pasta

Eftirréttir

Súkkulaði kaka með rjóma

Íslensk skyrkaka m/berjum

Heit eplakaka m/vanilluís

Ísdúett m/súkkulaðisósu

Hádegismatseðill

Súpa dagsins

Réttur dagsins

Þorskur m/karmelluðum lauk

Kjúklingabringa m/hunangs og hvítlaukssósu

Kaka dagsins og kaffi

Smáréttaseðill

Samloka hússins

Síldardiskur m/rúgbrauði

Salat m/beikoni, fetaosti og sólþurrkuðum tómötum

Kaka dagsins

Hrært skyrt með rjóma

Afmæli aftur og enn...

2008-06-23T11:00:00.005Z

Hún Erla Dóra vinkona á afmæli í dag og óska ég henni innilega til hamingju með öll 25 árin! Þó hún sé stödd í Vín sem stendur er von á henni innan skamms til landsins, (gleði, gleði) og verður hún knúsuð og kysst þá!

Hún á afmæli í dag....

2008-06-21T00:09:00.005Z

Einkadóttirin á afmæli í dag í þriðja skiptið á ævinni. Samt er svo ótrúlega stutt síðan við keyrðum með hana heim af fæðingardeildinni í glampandi sólskini í júní 2005.
Merkilegt hvað tímin líður!

Sæt og fín sjóræningjastelpa.

Elsku Dögun okkar, innilega til hamingju með 3 ára afmælið!

Pre-afmæli á leikskólanum

2008-06-20T13:30:00.006Z

Rannveig og Dögun eiga báðar afmæli á morgun þann 21. júní. Þær voru ekki gamlar þegar þær hittust fyrst og hafa hist reglulega síðan, fyrst í mömmuklúbbnum góða og svo á leikskólanum.

3-4 mánaða skvísur

Litlu eldri

Farnar að sitja

Leikskólaskvísur þann 20. júní 2008.

Ekki amalegt að vera í hásætunum í samverustundinni og ekki laust við að stoltið skíni í gegn.

Framhald...

2008-06-19T22:54:00.005Z

Eftir súkkulaðiköku með rjóma í vinnunni eldaði eldabuskan á heimilinu dýrindis saltfiskrétt handa afmælisbarninu, á eftir fylgdu afgangar af köku og rjóma ásamt góðu kaffi. Góður dagur í dag, þó var nánustu fjölskyldu sárt saknað, en þau spóka sig öll með tölu í Kóngsins Köben og hafa það notalegt. Þau hafa samt örugglega ekki fengið svona góðan salfisk í kvöld eins og var í boði á Lagarásnum, en hver veit nema þau fái hann síðar!

Mmm....

Desertdiskar voru í boði Dögunar og Glitnis!

ó þvílík hamingja!

2008-06-19T09:51:00.005Z

Ég á svo yndislegan mann!

Þegar ég var rétt að rumska í morgunsárið kom minn elskulegi með morgungjöf upp í rúm til mín og vakti mig með kossi.

Í pakkanum var hvorki meira né minna en: Harman/Kardon Soundsticks II - ætli þau Harpa mágkona hafi haft samráð þegar þau ákváðu gjafir fyrir okkur systkinin?

Takk fyrir ásin mín!!!

Sko frú Normu!

2008-06-19T09:25:00.004Z

Við fórum á fumsýningu á "Soffía mús á tímaflakki" laugardaginn var og skemmtum okkur konunglega. Ef maður á ekki að vera þakklátur fyrir þetta snilldar fólk sem við eigum hér og vill starfa í heimabyggð, þá veit ég ekki hvað.

H&M

2008-06-18T09:45:00.005Z

Af hverju er ekki H&M á Íslandi?

Og þá er ég ekki að tala um H&M Rovels, heldur hina eiginlegu H&M búð sem gengur svo vel og allir Íslendingar virðast svo æstir í að komast í, í öllum utanlandsferðum. Eða senda mágkonurnar út af örkinni þegar barnið er orðið fatalaust (hvar værum við án þín og H&M Harpa mín) ;o)

Gleðilegan 17. júní í gær gott fólk!

Hlaupahjólið vígt

2008-06-12T15:15:00.006Z

Sumir voru agalega stoltir þegar þeir mættu með nýja BLEIKA hlaupahjólið með ljósunum og hjálm á leikskólann, þriðjudaginn var. Dögun fannst frekar hallærislegt að fara með þríhjólið, enda stelpan alveg að verða 3 ára og Sillemú á nú víst orðið þríhjólið með réttu. Hlaupahjólið gerði mikla lukku því tvíhjólið fær stúlkukindin ekki fyrr en 21. júní í amælisgjöf. Þá ætlar Dögun líka að hætta með snuddur og arfleiða Sillemú af þeim líka, enda nota stelpur sem eiga "stórustelpuhjól" ekki snuddur!

Stoltur eigandi, hún passaði sko vel upp á sitt!

Lögreglan skoðar hjólið og hjálminn hjá skvísunni og gaf henni límmiða.

Flottar vinkonur á nýjum hjólum

Akureyrarferð

2008-06-12T14:52:00.002Z

Við Dögun áttum góða helgi fyrir norðan í faðmi ættingja. Við keyrðum með langömmu og langafa á Breiðdalsvík á föstudegi og komum aftur á sunnudegi. Tilefnið var það að Máney frænka og Víðir voru að gifta sig. (myndir koma seinna)

Þegar við komum um 09:30 á föstudegi var farið beint í bústað og grillað með Svölu, Árna, Ísold, Skildi, Bjarti, "Sponna", Eygló, Konna, Svenna, Sólnýju, Alexsöndru, Guðjóni, Sighvati, Pálmari, Jönnu ömmu og Guðjóni afa. Dögun, Bjartastur og Sponni kíktu í pottinn og undu vel við. Svo var farið um miðnætti niður í miðbæ til að hitta Hönnu Báru og Co. því við Dögun fengum gistingu í íbúð sem þau leigðu, á göngugötunni sem var afar hentugt. Seint og um síðir (þegar búið var að knúsa tvíbbakrúttin Arneyju og Védísi), tala við Hönnsu, Helga, Jóhönnu og Jóhann Inga var loksins skriðið í bælið.

Á laugardaginn var svo kíkt í smá búðir í góða veðrinu, fyrir brúðkaup sem var kl. 14:00 og veisla kl. 17:00. Allir voða glaðir og kátir og brúðhjónin geisluðu. Við Dögun vorum komnar heim um 09:30 þar sem þrek hjá sumum litlum var búið enda búin að pissa í sokkabuxur, brók og spariskó og mamman ekki með neitt til skiptanna meðferðis.

Sunnudagurinn var rólegur - Við sváfum vel og dúlluðumst heima fram undir hádegi. Þá fór Dögun í sund með ömmu súkkó, Árna og Bjarti. Á meðan skrapp ég í Pennan Eymundsson og rakst á Ingu (sem var líka í brúðkaupi ásamt famelíu) og kíkti svo á Friðjón Inga jr. og Sessu sem voru nýkomin til Akureyrar í sumarfrí.
Svo söfnuðust ættingjarnir smá saman upp í íbúðinni á göngugötunni og spjölluðu fram yfir kaffi. Áður en lagt var í hann austur aftur komum við svo við í bústaðnum góða til að kveðja liðið þar.
Við komum heim um 21:00 eftir bílveiki og stóra ælu yfir allan bílinn ala Dögun. Sem betur fer náði hún að sofna á miðri leið eftir uppköstin og var nokkuð góð þar til við komum heim. Enda spenningurinn yfir að setja saman bleika hlaupahjólið sem henni áskotanðist á Akureyri svo mikill að annað eins hefur vart sést. Pabbinn var því drifinn í það verk um leið og við komum inn úr dyrunum á meðan mamman dreif æluföt í þvott og skrúbbaði bílstólinn.
Dögun náði sér samt ekki niður fyrr en eftir miðnætti þrátt fyrir miklar æfingar á hjólinu þar sem dúrinn í bílnum var helst til langur.

Sjálfsánægja!

2008-06-06T09:43:00.001Z

Sundferðir 3 morgna í röð.....ahh.... mikið er þetta hressandi, vona bara að ég haldi þetta út!

Sund og heitir pottar

2008-06-04T11:29:00.008Z

Við Dögun skruppum í nýja pottinn hjá Blædísi og Dodda í gærkvöldi á meðan Óðinn skundaði á tónleika á Eskifirði. Það var svei mér ljúft. Dögun er búin að þrá það að komast í pottinn frá því að hún frétti af honum á laugardaginn og sú ósk rættist svo í gærkvöldi. Jóhanna byrjaði á að fara með Dögun ofan í, svo sagðist Grímkell ætla líka og á endanum stóðst ég ekki freistinguna og hlammaði mér í nuddsætið á pottinum og slakaði á. Eftir sullið var svo boðið upp á franska súkkulaðiköku ala Blædís með rjóma, ekki svo slæmt. Enda ráðgerum við Dögun að kíkja sem fyrst aftur í heimsókn.

Í morgun var ég svo mætt í sundlaugina kl.08:00 og syndi eins og fiskur nokkrar ferðar áður en ég sleikti sólina í pottinum og teygði á stirnuðum vöðvum fyrir vinnuna. Eins gott að það verði gott veður í sumar svo ég nenni að halda þessu uppátæki áfram.

Á föstudaginn er svo ráðgerð ferð hjá okkur Dögun til Akureyrar til að gifta Máneyju og Víði áður en þau flytjast af landi brott. Þar verður tóm gleði og fullt af ættingjum, við hlökkum ógurlega til. Mest hlakkar Dögun þó til að fá að fara í heitapottinn með Bjarti frænda sínum (það er víst heitur pottur í bústaðnum sem Eygló og Konni leigðu).

Ég verð að fara að sannfæra Óðinn um gæði þess að eiga heitan pott. Hann mætti þess vegna vera eldiviðarkyntur eða uppblásinn.

Mætt á svæðið.

2008-05-31T17:21:00.004Z

Nýja tölvan er mætt á svæðið, geislandi af fegurð og góðu viðmóti.

Hún hefur hlotið nafnið Bóthildur Grámann þar sem hún kemur í stað Henriettu Guggenheim von Gorm heitinnar.

Bóthildur er kærkomin viðbót í heimilið og mun auðvelda tölvufíkn okkar til muna. Velkomin kæra vina!

Glugga-steik

2008-05-28T13:50:00.004Z

Þessi sól á glugganum mínum í vinnunni er ekki klárlega ekki til góðs. Mig dreymir um að komast út í blíðuna og spóka mig í sólinni undir berum himni. Eiga íslendingar ekki rétt á fríi loksins þegar kemur gott veður á Klakanum??? Alla vega austfirðingar, þetta gerist ekki svo oft hér á bæ.

Ammli, ammli....

2008-05-26T14:29:00.003Z

Vegna tölvuhallæris hef ég ekki komist í að setja inn afmæliskveðjur um helgina.

En sem sagt:

22. maí átti Nökkvi frændi 23 ára afmæli

23. maí varð Sessa vinkona 25 ára.

24. maí komst Guggi bróðir á fertugsaldurinn er hann fyllti heila 3 tugi.

25. maí átti Guðjón afi afmæli, en hann varð nú bara 71 árs.

Ég óska öllum þessum afmælisbörnum til hamingju með afmælin!

Á laugardaginn tókst fóstursyninum að útskrifast með stæl úr ME og var að sjálfsögðu boðið í veislu að því tilefni.

TIL HAMINGJU DAGUR!

Á miðvikudaginn komandi, 28. maí, á svo besti frændinn hann Óðinn Skúli afmæli, og mun drengurinn ná hinum merka 6 ára aldri með öllu sem því fylgir. Dögun bíður spennt eftir því afmæli.

Binni bróðir hans mun svo verða árinu eldri þann 30. maí.

Prinsessan Dögun

2008-05-16T14:24:00.005Z

Númi bróðir saumaði þennan frábæra kjól á frænku sína í handavinnu um daginn. Dögun var voða glöð og ánægð í kjólnum, enda ekki á hverjum degi sem að maður fær sérhannaðan og sérsaumaðan prinsessukjól.

Takk fyrir Númi minn!

3 sniðugir hlutir:

2008-05-06T09:24:00.007Z

Þessi vagga/rúm er algjör snilld, ég rakst á link á þetta rúm á Obbosí. Rúmið heitir Culla Belly og er hannað af Manuela Busetti og Andrea Garuti. Ótrúlega flott hönnun sem myndi sóma sér vel undir hvaða kríli sem er:

Magapoki sem hengja má á vegg þegar manni er mál. Nú þarf ekki að leggja börnin á skítugt gólf á almenningsalernum eða böglast með þau í fanginu þegar þú pissar:

Ryksuga sem er líka leikfang. Krakkarnir geta setið í á meðan foreldrarnir ryksuga þegar þau eru lítil. Þegar þau stækka geta þau ryksugað sjálf með því að fara í bílferðir um gólfið í íbúðinni:

Góð ferð að baki!

2008-05-05T09:50:00.017Z

Það var svo gott að komast aðeins suður. Eftir hörmungar-veður á miðvikudeginum með 30 cm. snjó yfir öllu stungum við af í sólina í Reykjavík.

Tengdó náðu í okkur á völlinn og skutluðust með okkur upp á Grettisgötu þar sem heil íbúð beið okkar. Draslinu var hent inn og haldið beint upp á Skólavörðustíg að kikka á Bleggeddu og nýja bróðurinn (og foreldrana líka svo sem). Þar krúsuðum við fram á kvöld (með 20 mínútna shopping ferð inn á milli) og borðuðum dýrindis lax í góðri sósu með sítrónugrasi ásamt góðu víni.

Svo skunduðum við niður á Grettisgötu eftir smá stopp í kjörbúðinni á horninu til að eiga mjólk í kaffið og brauð í morgunmat (þess má geta að þetta litla sem ég keypti kostaði mig jafn mikið og hefði ég boðið Óðni og Dögun út að borða á Vegamótum morguninn eftir..... merkilegt hvað maður lætur plata sig, svo kvartar maður yfir Samkaupum á Egilsstöðum!).

Daginn eftir kúrðum við til 09:00 (Dögun vaknaði síðust af öllum, alla morgna) og dúlluðumst heima fram undir hádegi en fórum þá í göngutúr niður Laugaveginn og enduðum einmitt á Vegamótum í hádegisverði. Mæli með matnum þar, fínn matur og góðu verði. Við sátum úti í sólinni allan tímann og nutum þess að hafa komist burt úr snjóhríðinni fyrir austan. Þetta var allt voðalega yndislegt og gott, eða allt þar til 3 risa geitunar fóru að trylla lýðinn á staðnum. Einn flaug ítrekað í andlitið á mér en flutti sig svo á næsta borð, þar tókst nokkrum ungum mömmum, með mikilli hetjudáð, að fanga kvikindið í glas. Móðureðlið hjá þeim greinilega í lagi og þær vörðu börn sín með miklum sóma. Ég hins vegar var að því komin að hlaupa í burtu og skilja Dögun eina eftir hjá flugu-kvikindinu. En þegar Dögun gargaði upp yfir sig af skelfingu við flugu nr. 2 sem var komin á staðinn áttaði ég mig á að ég ætti kannski að kippa henni með mér líka. Sem við gerðum, enda búin að borða. Þegar við biðum eftir Óðni (sem fór að borga) í hæfilegri fjarlægð frá borðunum, sáum við hvar þriðja flugan var farin að pirra fólk.

Dögun að borða Vegamótapizzu í sólinni.

Eftir þetta fór Óðinn í e-ð bíla mission fyrir Dagrúnu en við Dögun fórum til Ísoldar frænku til að líta á bræðurna Bjart besta skinn og Sponna spíturass. Bjartur var lítið breyttur frá því síðast, alltaf jafn mikill Emil í Kattholti með sín bláu augu og skemmtilegu lífsgleði. Sponni spíturass stóðst líka fyllilega væntingar og meira en það. Mikið sem hann var (og er) mjúkur og fallegur strákur.

Sponni spíturass sem fær bráðum nafn.

Svo fór Bjartastur með ömmu sinni í kröfugöngu á meðan Sponni, Ísold, Dögun og ég fórum og náðum í Eygló út á Nes því svo var ferðinni heitið á Álftanesið að heimsækja forseta voran.....eða ekki. Við slepptum því í þetta skiptið og litum í staðinn í heimsókn til the JJ's og tvíburasystranna Arneyjar og Védísar. Ekki urðum við heldur fyrir vonbrigðum með þær systur, algjörar sponsur. Hanna Bára og Helgi komu líka um leið í heimsókn og það var mikið dáðst að krílum, nýja húsinu og veitingunum!

Arney, Sponni og Védís, vantaði bara Úlfinn góða
Dögun komin í hópinn

Svo var brunað í bæinn og kallinn sóttur áður en haldið var út á Seltjarnarnes í nýja FLOTTA húsið þeirra Svölu og Árna. Þar var svo dýrindis matur, indverskur kjúkklingaréttur með naanbrauðum og nóg af drykkjarföngum með. Dögun og Bjartur fengu svo auðvitað súkkulaðiís hjá ömmu súkkó en hinir þessa dýrindis jarðarberja tertu og kaffi. Við fórum södd og sæl heim eftir mikinn heimsóknardag.
Föstudagur rann upp með góðu veðri. Tengdó komu og pössuðu Dögun kl. 08:30 meðan við foreldrarnir sinntum nokkrum erindum í sitthvoru lagi. Svo kom Sessa alla leið frá Kjalarnesi að kíkja á okkur með litla Friðjón Inga sjarmatröll. Við borðuðum bakaríis bakkelsi heima og fórum svo í göngutúr á laugarveginum með krílið og Dögun. Takk fyrir að nenna að keyra til okkar Sessa!!!
Óðinn og Tengdó komu heim um hádegi og við fórum í eina Kringluferð, þar sem verslað var töluvert. Þar á meðal voðalega fínan Kartell lampa (Bourgie Table Lamp) sem er ammlisgjöf frá Ma og Pa. Þau verða kysst og knúsuð fyrir gripinn þegar hann skilar sér í póstinum á morgun eða hinn.
Dögun var til fyrirmyndar og eins og ljós í Kringlunni og bað ekki um neitt og naut þess bara að sitja í kerrunni og horfa á allt.

Úr Kringlu fórum við að kíkja á nýja húsið hennar Helgu Jónu, þar fann Dögun margt skemmtilegt dót síðan Þorvaldur Davíð var lítill og undi vel við að skoða það. Auk þess tók hún nokkur hopp á risa trampólíni í garðinum - þvílík gleði!

Svo keyrði Helga okkur til Tengdó í dýrindis lambarlæri. Við fórum frekar snemma heim miðað við að vera í Rvk. á föstudagskvöldi....... en svona er þetta. Við horfðum bara á DVD á Grettisgötunni í staðinn.
Þarna fréttum við líka að Olla og Ingólfur væru búin að eignast stóran og fínan strák á Norðfirði og óskum við þeim, Degi, Dagrúnu, Arnari og Atla innilega til hamingju með drenginn/litla bróður!

Laugardagurinn var rólegur. Áttum eins von á að hitta Snærúnu frænku og Co. en þau þurftu að komast í sumarbústaðinn sinn og því hittum við þau bara í næstu ferð.
Við fórum út í göngutúr undir hádegi að reyna að finna bleika hlaupaskó á Dögun sem átti þá ósk síðan áður en lagt var í ferðina suður. En engar íþróttabúðir voru opnar svo við löbbuðum niður að Caffé Paris og hittum þar kunningja og fengum okkur kaffi og hádegismat. Þaðan gerðum við svo aftur ítarlega leit að góðum skóm á dömuna en án árangurs. Það var ekki fyrr en við komum í Hnokka og Hnátur á Skólavörðustígnum að við fundum fallega bleika leðurskó (ekki beint hlaupaskó...hmmmm....) en Dögun var alsæl og kallar skóna "hlaupaskó" þrátt fyrir að þeir séu nú meira spariskór en hlaupaskór. Móðirin var alla vega hamingjusöm að Solla stirða náði ekki yfirráðum í skóvali að þessu sinni...... en það verður ekki langt að bíða hugsa ég.

Dögun og Bergþóra Edda að leika sér, Dögun í bleiku hlaupaskónum!

Árni Daníel og Stína

Fjölskyldan á Skólavörðustígnum

Kl. 14:00 fórum við í nefningu hjá Lillemann Grétarssyni sem hlaut nafnið: Árni Daníel. Það passar afskaplega vel við hann, enda hið fallegasta nafn. Hjá Stínu og Grétari borðuðum við nefningar-veitingar og fengum svo bílinn lánaðan út á flugvöll og skelltum okkur austur eftir góða daga í Borginni góðu.

Ferðin í hnotskurn var sem sagt: Matur, börn, matur, börn, matur, verslun, matur, börn og matur! Ekki slæmt!

Lok, lok og læs

2008-04-30T11:30:00.002Z

Nú fer ég að læsa síðunni.

Fuuult af heimsóknum ( yfir 50 síðan í gær) en engin kvitt eða komment........

Ó Borg mín Borg.....

2008-04-29T09:16:00.009Z

Helgin var ljúf eins og sú síðasta.

Á miðvikudagskvöld komu tengdó frá Reykjavík, Dögunar til mikillar gleði. Hún var svo spennt að hitta þau gömlu að hún var að fara á límingunum.

Á sumardaginn fyrsta fórum við og fengum okkur bleikan ís eins og áður var sagt.

Á föstudaginn fagnaði Erla svilkona 45 ára afmæli og bauð í teiti. Jónína (dóttirin) sá að mestu um veitingar, sem voru ekki af verri kantinum, og skipulagnignu. Ég tók að mér að koma með lime-sósu, bruchettur og bláberjapæ. Þar var mikið borðað og skálað og Erla bar aldurinn svo vel að tengdapabbi yngdi hana óvart um 10 ár og taldi hana 35 ára. Mig grunar að það hafi verið besta gjöfin ;o)

Laugardagurinn var rólegur, svo rólegur að ég man ekki hvað við gerðum. Fyrir utan það að fara út að borða á Nielsen í hádeginu í léttan hádegisverð. Og jú, svo var eldað lamb og meðlæti fyrir tengdó áður en þau lögðu í hann suður á sunnudagsmorgunn.

Á sunnudaginn var farið í hádegisgöngutúr út í skóg með nesti og kaffi. Voða notalegt! Komum svo við hjá Ma og Pa og smurðum gamla spiladós frá 1964, hún svínvirkar núna. Smurðum líka hjólið mitt svo við gætum drifist með það í viðgerð í Skóga sem við gerðum.

Í gær dreifst svo Óðinn aftur í Skóga til að fjárfesta í hlaupaskóm, nú á að fara að taka á því. En mikið eru svona hlaupa/skokk skór þægilegir, ef þeir væru ekki svona ljótir í lagi og útliti myndi ég ganga á svona skóm alltaf!

Svo á morgun er stefnt á Rvk. ferð og staldrað við í Borginni fram á laugardag. Planið er þétt og ekki að undra þegar á að hitta 5x nýbura og foreldra þeirra + aðrar útréttingar. En einhvern vegin hljótum við að komast yfir þetta á endanum.

Merkisafmæli!

2008-04-24T13:04:00.003Z

Hún Harpa skarpa mágkona er hvorki meira né minna en þrítug í dag.

Innilega til hamingju með daginn elsku Harpa. Við á Lagarásnum fórum og fengum okkur bleikan ís í dós í tilefni afmælisins og sumardagsins fyrsta. Við vildum auðvitað að þið hefðuð verið nær svo þið hefðuð líka fengið bleikan ís, en þið verðið bara að eiga það inni í sumar.

Í tölvuleysinu höldum við áfram að stela myndum af heimasíðu Úlfsins. Hér er ein af afmælisbarninu og einkasyninum.

Góð helgi að baki.

2008-04-21T13:11:00.007Z

Veðrið var æðislegt og við komin út kl. 10:00 í sólina á laugardagsmorgunn. Ég fór og verslaði smá barnaföt á Dögun og Úlfinn fyrir sumarið. Svo kíktum við í kaffi til Erlu og Árna og Dögun ílengtist svo þar fram á næsta dag. Á meðan fóru foreldrarnir heim að taka til og þrífa fyrir matarboð.

Notalegur matarhittingur um kvöldið þar sem allir komu með e-ð gott meðferðis. Ég stal forréttarhugmyndinni hennar Írisar þar sem hún var lasin og komst ekki sem var mozzarella og tómatar með ferskri basiliku, svo komLóa með ódauðlegan saltfiskrétt, Edda kom með frábært spínat-mangó salat og heimabakað brauð, Tóta kom með fullt af ávöxtum og súkkulaðimús og ég bætti við Lime-peakanhnetu pannacotta. Inga og Halli komu svo með toppinn yfir i-ið og komu með líkjöra með kaffinu eftir á. Þetta var sem sagt bara ljúft og liggur við að ég sé enn södd! Þessu var auðvitað skolað niður með passlegu magni af rauðum og hvítum veigum, auk svalandi gyllts gosvatns. Takk fyrir gott kvöld kæra fólk.

Á sunnudaginn var svo náð í skrípið í pössun og farið beint á Mánatröð 6 og vonast eftir kaffi, en þau voru þá á leið í sund og tóku Dögun með sér, en ég fór heim og vaskaði upp eftir mataraboð og bakaði svo lummur-bröns fyrir þreytta sundgarpa.

Um miðjan dag skruppum við tríóið í göngutúr inn í Hallormsstað í þessari rjómablíðu. Dögun undi vel við að kasta steinum í Lagarfljótið og finna greinar sem gögnuðust sem göngustafir. Svo borðuðum við nesti í skóginum og höfðum það gott.

Þegar heim kom fórum við í að klippa limgerðið fyrir framan húsið og taka síðustu jólaseríuna úr garðinum (hún var frosin undir ís þar til í síðustu viku) og fórum inn um kvöldmatarleitið þreytt og sæl eftir útiveru dagsins. Ég endaði svo kvöldið á að skipta um mold á öllum blómunum mínum, sem eiga pottþétt eftir að láta lífið af ástúð og vídamín-kipp þar sem þeim hefur aldrei verið sinnt sem skildi. Í mesta lagi verið skvett á þau nokkrum vatnsdropum þegar ég hef séð þau aðfram-komin af þorsta og við það að skrælna. En nú er að bíða og sjá hvort þetta hefur dugað til að hressa upp á þau eða hvort þau óverdósa af næringu.

Sólin skín í dag líka og helst vonandi sem lengst. Ég splæsti í súkkulaðisnúða á samstarfsfélagana í kaffitímanum í tilefni af sykurþörf og góðu skapi, mér sýndist þeir falla vel í kramið. Nú vona ég bara að einhver api upp eftir mér vitleysuna og komi með e-ð gott í næsta kaffi ;o)

Laugardagur til lukku.

2008-04-18T11:53:00.002Z

Eftir streptókokkaárás nr. 2 þettað árið er ég að skríða saman og farin að plana matar-hitting hjá saumaklúbbinum annað kvöld. Það verður ljúft að hittast og eta og drekka á sig gat! Ég er strax farin að smjatta á rauðvíninu í huganum.......

Kannski ég splæsi í Lottómiða í tilefni af þess að potturinn er fjórfaldur...... ég á samt sennilega eftir að gleyma því, ég gleymi alltaf að kaupa miða þegar ég ætla mér það. Enda hef ég aldrei unnið í lukkuspilum, en það kannski helst í hendur?

Annars er kominn vor-fýlingur í mig. Þegar ég smurði andlit dóttur minnar með sólvörn í morgun fannst mér sumarið vera á næsta leiti. Í sömu andrá var ég komin út í garð í huganum, Óðinn stóð við grillið og grillaði humar, ég sat með hvítvínsglas í hendi og sleikti sólina á meðan Dögun sullaði í gúmmílauginni. ......svo var manni kippt aftur inn í raunveruleikann þegar Óðinn kallaði að klukkan væri alveg að verða 08:00 og tími til að koma sér af stað í vinnuna.

Jæja, sumarið kemur vonandi samt, seint og um síðir. Á meðan óska ég ykkur góðrar helgar með sól í hjarta!

Ammli

2008-04-18T08:47:00.004Z

Hann pápi gamli...., eða afi ungi eins og hann er kallaður hér á bæ, átti afmæli í gær og fær hann auðvitað hinar mestu og bestu afmæliskveðjur frá Lagarás tríóinu. En vegna tölvu vesens var ekki unnt að koma þessu inn fyrr en í dag. Innilega til hamingju með gærdaginn!

Húrra fyrir þeim sem enn nennir að berjast fyrir óréttlæti!

2008-04-09T09:10:00.003Z

Langar að benda á þessa ágætu frétt sem kom í DV í gær. Svo er gert ráð fyrir að svipuð frétt komi í 24 stundum í dag eða á morgun.
Áfram Harpa!

úff....

2008-04-08T12:12:00.005Z

Með ónýta tölvu, skemmdan bíl, krónískan hausverk, hækkandi skuldir, leka stutru og yfirvofandi skólaumsóknarverkefni sem ég skil ekkert í hef ég ákveðið að leggjast í dvala fram á vor. Annars á ég á hættu að e-ð meira skemmist eða endi illa. Merkilegt að ég skuli enn halda vinnunni.....

Mér er ekki skemmt!

2008-03-30T11:10:00.009Z

Í gær fór ég niður á Gistiheimilið á Egilsstöðum til að sinna opnunar-teiti 700IS. Þar lagði ég bílnum samviskusamlega í stæði beint fyrir framan Gistihúsið, fyrir aftan fallegan vínrauðan jeppling og taldi ég að stæðið væri öruggt.

Þarna var kl. 21:11. Þegar ég kom hins vegar út af gistiheimilinu um 02:37 var komið mikið kóf og leiðinda veður og þegar ég ætlaði að hlaupa til og opna bílstjóra hurðina á bílnum var hún föst. Ég var hálf hissa og reyndi á afláts að opna, en það var ekki fyrr en mér var litið á hurðina fyrir aftan framhjólið að ég sá hvað var að, það var búið að klessa á bílinn og sá hinn sami stunginn af!!!!
Engin ummerki sáust þar sem veðrið var svo vont og löngu fennt og skafið í öll bílför.

Við fórum aftur inn og hringdum á lögregluna, en að sjálfsögðu var hún sofandi heima hjá sér á laugardagskvöldi og bara símsvarinn á. Við enduðum því á að keyra bílinn heim með Gulla sem vitni af staðsetningu bílsins og beyglunni.

Nú trúi ég ekki að það séu engin vitni af þessu þar sem mikið af fólki var á staðnum og allir bílar sem voru á ferðinni fullir af fólki því enginn labbaði í þessu veðri.

Nú óska ég s.s. eftir vitnum af árekstri fyrir utan Gistiheimilið á

Egilsstöðum á dökk-gráan Toyota Auris milli 21:11 og 02:37 laugardagskvöldið 29. mars 2008! Líklega er um lítinn bíl að ræða með svartan stuðara, þar sem beyglan er mjög neðarlega, sem hefur bakkað á eða runnið til við að snúa og klesst á bílinn minn. eða bíll með kerru. Bíllinn gæti verið ljós því hvítar rákir voru á lakkinu mínu og svart nudd eftir líklega stuðarann.

Lögreglan tók þetta loksins út 31. mars svo þetta er komið á skjöl hjá þeim ásamt nákvæmum myndum.